ޔޫރޯ 2020 ގްރޫޕް އޭ ގައި ތުރުކީވިލާތާއި ވޭލްސް ބައްދަލުކުރިމެޗުން ވޭލްސް މޮޅުވީ އެޓީމްގެ ހުރިހާ ކުޅުންތެރިން ކުރި ބުރަ މަސައްކަތުންކަމަށް އެޓީމްގެ ކެޕްޓަން ގެރެތު ބޭލް ބުނެފިއެވެ. ބޭލް މިހެން ބުނެފައިވަނީ ރޭގެ މެޗަށްފަހު ނޫސްވެރިންނާއި ވާހަކަ ދައްކަމުންނެވެ.
ތުރުކީވިލާތާއި ވޭލްސް ރޭ ބައްދަލުކުރިމެޗް 2 ލަނޑު ސުންލަނޑުން ކާމިޔާބުކުރީ ވޭލްސްއެވެ. ރޭގެ މެޗްގެ ސްޓަރ އޮފް ދަ ގޭމަށް ހޮވުނު ބޭލް ބުނީ ރޭގެ މެޗުން މޮޅުވުމުން ވަރަށް އުފާވާކަމަށެވެ. މިކާމިޔާބީއަށްޓަކައި ޓީމުގެ ހުރިހާ ކުޅުންތެރިން ވަރަށް ބުރަކޮށް މަސައްކަތް ކުރި ކަމަށާއި އަދި މިފެނިގެންދިޔައީ އެމަސައްކަތުގެ ނަތީޖާކަމަށް އޭނާ ބުންޏެވެ. މިމެޗްގައި ބޭލް އަތުން ޕެނަލްޓީއެއް މިސް ވި ނަމަވެސް އޭނާއަށްވެސް ރަނގަޅު ކުޅުމެއް މިމެޗްގައި ދެއްކުނު ކަމަށް ގަބޫލް ކުރާކަމަށްވެސް ބޭލް ބުންޏެވެ. މިމެޗުގައި ބޭލް ވަނީ އެޓީމުން ޖެހި ދެލަނޑު ޖެހުމުގައި ވެސް އެސިސްޓް ކޮށްފައެވެ. އަދި މިއީ ވަރަށް މުހިންމު ކާމިޔާބީއެއްގެ ގޮތުގައި އޭނާ ސިފަކުރިއެވެ.
މިމެޗްގައި ވޭލްސްގެ ދެވަނަ ލަނޑު ޖަހައި ދިން ރޮބަރޓްސް ބުނީ އެއީ އޭނާގެ ހަޔާތުގެ އެންމެ އުފާވެރި ވަގުތުކޮޅުކަމަށެވެ. އަދި އެފަދަ ވަގުތެއް ދެން އަންނާނެކަމަށް ޤަބޫލުނުކުރާކަމަށް ވެސް އޭނާ ހާމަކުރިއެވެ. ރޭގެމެޗުން މޮޅުވުން މިއީ މިމުބާރާތުގެ ދެވަނަ ބުރަށް ދިއުމަށް އެޅުނު ރަނގަޅު ފިޔަވަޅެއްކަމަށް އޭނާ ސިފަކުރިއެވެ. އަދި މިއަންނަ އާދީއްތަ ދުވަހު އިޓަލީވިލާތާއި ދެކޮޅަށް ކުޅޭމެޗަކީ ވަރަށް މުހިންމު މެޗެއް ކަމަށް ވެސް އޭނާ ބުންޏެވެ.
ވޭލްސްގެ ކޯޗު ރޮބް ޕޭޖްވެސް ހުރީ ރޭގެ ކާމިޔާބީއާއެކު ވަރަށް ހިތްހަމަ ޖެހިފައެވެ. އަދި އޭނާގެ ކުޅުންތެރިންނާއި މެދު ވަރަށް ފަހުރުވެރިވާކަމަށްވެސް އޭނާ ބުންޏެވެ. އޭނާ ބުނީ ޓީމްގައި ޑޭން ޖޭމްސް، އާރޮން ރަމްސީ، ގެރެތު ބޭލް، ކީފަރ މޯ ފަދަ ކުޅުންތެރިން ތިބިއްޔާ ކޮންމެ ޓީމަކަށް ވެސް ނުރައްކާ ކުރާނެކަމަށެވެ. އަދި ރޭގެ މެޗްގައި ބޭލް އަތުން ޕެނަލްޓީއެއް ގެއްލިގެންދިޔަ ނަމަވެސް އޭނާ ވަނީ މިމެޗްގައި މޮޅު ކުޅުމެއް ދައްކައިފައިކަމަށް ޕޭޖް ބުންޏެވެ.
ތުރުކީވިލާތުގެ ކޯޗް ސެނޯލް ގުނޭސް ބުނީ ރޭގެމެޗްގައި ވޭލްސްގެ ފެށުން ރަނގަޅުވީ ކަމަށާއި އެޓީމަށް އޭގެ ފައިދާވެސް ރަނގަޅަށް ނެގުނީ ކަމަށެވެ. މެޗްގައި ފަހުން އޭނާގެ ކުޅުންތެރިންވެސް ހަމައަކަށް އެޅި ރަނގަޅަށް ކުޅެ ގިނަ ހަމަލާތަކެއް އުފެއްދި ކަމަށާއި ނަމަވެސް ލަނޑެއް ޖެހޭގޮތް ނުވީކަމަށެވެ. އަދި ތުރުކީގެ ޑިފެންޑަރ އުމުޓް މެރާސް ވަނީ ރޭގެމެޗުން ތުރުކީ ބަލިވީތީ އެކަމަށް މައާފަށްވެސް އެދިފައެވެ. އޭނާ ބުނީ ރޭގެމެޗުން ތުރުކީވިލާތް މޮޅުވާން ވަރަށް ބޭނުންވި ކަމަށާއި އެވަރަށް ޓީމަށް ނުކުޅެވުނީކަމަށެވެ. އަދި ގްރޫޕްގެ ފަހުމެޗުން މޮޅުވާން ވަރަށް މަސައްކަތް ކުރާނެކަށް މެރާސް ބުންޏެވެ.