ކޮޕާ އެމެރިކާ ފުޓްބޯޅަ މުބާރާތުގެ ގްރޫޕް އޭގައި ޕެރަގުއާއި އާއި ބޮލީވިއާ ބައްދަލުކުރިމެޗް ޕެރަގުއާއި ކާމިޔާބުކޮށް ގްރޫޕްގެ އެއްވަނައަށް އަރައިފިއެވެ. މިމެޗް ޕެރަގުއާއި ކާމިޔާބުކުރީ ފަހަތުން އަރާ 3 ލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ހާފްގައި ބޮލީވިއާއިން ވަނީ ރަނގަޅު ކުޅުމެއް ދައްކާފައެވެ. އަދި މެޗްގެ 10 ވަނަ މިނެޓްގައި ލިބުނު ޕެނަލްޓީއަކުން އަރވިން ސާވެޑްރާވަނީ އެޓީމަށް ލީޑުވެސް ނަގައިދީފައެވެ. މިމެޗް ޕެރަގުއާއި ކޮޅަށް އެނބުރިގެންދިޔައީ ފުރަތަމަ ހާފްގެ އިތުރު ވަގުތުގައި ބޮލީވިއާގެ ހުއާންމޭ ކުއެލަރއަށް ރަތްކާޑު ދެއްކުމާ ހިސާބުންނެވެ. އެހެންކަމުން މިމެޗްގެ ފަހު ހާފް އެއް ކޮށް ބޮލީވިއާ ކުޅުނީ އެއް ކުޅުންތެރިއެއް މަދުކޮށެވެ. އަދި މިކަމުގެ ފައިދާ ނަގާ ދެވަނަ ހާފްގައި ޕެރަގުއާއިއިން ވަނީ އެޓީމުން ލަނޑެއް ޖެހުމަށް ކުރަމުންދިޔަ މަސައްކަތް އިތުރުކޮށްފައެވެ. މިމެޗްގައި ޕެރަގުއާއިގެ ފުރަތަމަ ލަނޑު މެޗްގެ 62 ވަނަ މިނެޓްގައި ޖަހައިދިނީ އެޓީމްގެ އަލެހަންޑްރޯ ރޮމޭރޯއެވެ. އަދި މިމެޗުގައި ޕެރަގުއާއި އަށް ލީޑު ނަގައިދިން ލަނޑު އޭގެ ތިން މިނެޓްފަހުން ޖަހައިދިނީ އެންގެލް ރޮމޭރޯއެވެ. ޕެރަގުއާއިގެ ފަހު ލަނޑު މެޗްގެ 80 ވަނަ މިނެޓްގައި ޖަހައިދިނީ ވެސް ދެވަނަ ލަނޑު ޖަހާދިން އެންގެލް ރޮމޭރޯއެވެ.
މިކާމިޔާބީއާއެކު މިވަގުތު ގްރޫޕް އޭގެ އެއްވަނަ ޓީމެއްގެ ގޮތުގައި އޮތީ ޕެރަގުއޭއެވެ. މިގްރޫޕްގައި ރޭ އާޖެންޓީނާ އާއި ޗިލީ ބައްދަލުކުރިމެޗް ނިމުނީ އެއްވަރުވެގެންނެވެ.