ދެކުނު އެމެރިކާގެ ޤައުމުތަކުގެ މެދުގައި ކުޅޭ އެންމެ ބޮޑު ފުޓްބޯޅަ މުބާރާތް ކަމަށްވާ ކޮޕާ އެމެރިކާގެ ގްރޫޕް އޭގައި އާޖެންޓީނާ އާއި ޗިލީ ބައްދަލުކުރިމެޗް އެއްވަރު ވެއްޖެއެވެ. ބްރެޒިލްގެ ރިއޯ ޑި ޖެނީރޯގައި ކުޅުނު މިމެޗް ނިމުނީ އެއްލަނޑު އެއްލަނޑުން ދެޓީމް އެއްވަރުވެގެންނެވެ.
މިމެޗް ފެށުމުގެ ކުރިން މިދިޔަ އަހަރުގެ ނޮވެމްބަރުމަހު މަރުވި ދުނިޔެ ދުށް އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ އާޖެންޓީނާގެ ޑިއޭގޯ މެރެޑޯނާގެ ހަނދާންތައް އާކުރުން އޮތެވެ. މިގޮތުން ލައިޓް އެންޑް އިފެކްޓްސް ބޭނުންކޮށްގެން ހާއްސަ ޑިސްޕްލޭއެއް ދަނޑުމަތީ ދައްކާލިއެވެ. މިގޮތުން މެރެޑޯނާގެ ހޮލޮގްރެފިކް ވަރޝަންއެއް ދަނޑު މެދުގައި ބޯޅަ ހިފައިގެން އުޅޭ ތަނާއި 1986 ވަނަ އަހަރުގެ ވާރލްޑް ކަޕްގައި މެރެޑޯނާގެ ފަރާތުން ފެނިގެން ގޮސްފައިވާ ބައެއް މޮޅެތި ލަނޑުތަށް ދައްކާލިއެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 33 ވަނަ މިނެޓްގައި ލިބުނު ހިލޭ ޖެހުމަކުން ކާމިޔާބުކޮށްދިނީ އާޖެންޓީނާގެ ކެޕްޓަން ލިއޮނެލް މެސީއެވެ. މިއީ އޭނާ ޤައުމީ ޓީމަށް ޖަހައިދިން 73 ވަނަ ލަނޑެވެ. ޗިލީއިން މިމެޗްގެ ނަތީޖާ ހަމަހަމަކުރި ލަނޑު މެޗްގެ 57 ވަނަ މިނެޓްގައި ޖަހާފައިވަނީ އެޑުއާޑޯ ވާގާސްއެވެ. މިލަނޑަކީ ޗިލީއަށް ލިބުނު ޕެނަލްޓީއެއް އަރުޓޫރޯ ވިޑާލް ފޮނުވާލުމުން ކީޕަރ ދިފާއުކުރި ވަގުތު ލިބުނު ބޯޅައިން ވާގާސް ކާމިޔާބުކުރި ލަނޑެކެވެ. މިމެޗްގައި ލަނޑު ޖަހާނެ އިތުރު ފުރުސަތު ދެޓީމަށް ލިބުނު ނަމަވެސް ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ކުރެވޭގޮތެއް ނުވިއެވެ.