ލޮކްޑައުންގެ މިދަނޑިވަޅަކީ އެތައް ބައެއްގެ ވިޔަފާރިއަށް އެކި ގޮތްގޮތުން އަސަރުކުރަމުން އަންނަ ދުވަސްވަރެކެވެ. ބުދަދުވަހުގެ އިރު އިބްރާހިމް އާސިމްއަށް އެރީ ދިރިއުޅުމަށް ކުރަމުން އައި މަސައްކަތް އެއްކޮށް އެފުށް މިފުށަށް ޖެހުނުކަން އަންގައިދިން ފޯނު ކޯލަކުންނެވެ.
ރުވާގު މަގުގައި ހުންނަ ޖުވެލަރީ ޕެލެސް ހިންގަމުން އަންނަ އާސިމްއަށް ގުޅީ ޢާއްމުކޮށް އޭނާގެ ފިހާރައަށް އަންނަ ކަސްޓަމަރެކެވެ. ފިހާރައިގެ ދޮރުތައް ހުޅުވާފައި ހުރިއިރު އެއްވެސް މީހެއް ނެތުމުން ވެގެން އުޅޭގޮތެއް ބަލަން އެމީހާ ގުޅުމުން އާސިމްއަށް ލިބިގެންދިޔައީ ހައިރާންކަމެކެވެ. އެހެންނަމަވެސް ކަމެއް ގޯސްވެއްޖެކަން ނަގައިގަނެވި ފިހާރައިގައި މަސައްކަތްކުރާ މީހާއަށް ގުޅާ ފިހާރައަށް އައުމަށް ބުނެ އޭނާވެސް މިސްރާބު ޖެހީ ފިހާރައަށެވެ. ފިހާރައަށް ދިޔުމުން ލިބިގެންދިޔައީ ބޮޑު ޝޮކެކެވެ.
ފިހާރާއިގައި ހުރި އަގުބޮޑު ޖަވާހިރުތަކާއި ހަދާފައިވާ ރަން ރިހީގެ ފަށާއި އަނގޮޓިއާއި ދެންވެސް ހުރި ހުރިހާ މުދަލެއް އެއްކޮށްވަނީ ގެންގޮސްފައެވެ. ވައްކަމުގެ މިޙާދިސާގެ މަޢުލޫމާތު ޕީއެސްއެމް ނިއުސްއާއި ހިއްސާކުރައްވަމުން ފިހާރައިގެ ވެރިޔާ އިބްރާހިމް އާސިމް ބުނީ އެންމެ ކަންބޮޑުވަނީ މީހުން ހަދަން ދީފައި ހުރި ރަނުގެ އެކި އެއްޗެތި ގެންދިޔުމުންކަމަށެވެ. ފިހާރައިން ގާތްގަނޑަށް 4 ލައްކައެއްހާ މުދާ ވަގަށް ނަގާފައިވާއިރު މިފިހާރަ ހުރީ އިންޝުއަރނުކޮށެވެ.
މިވައްކަމުގައި ގިނަ ޢަދަދެއްގެ ގަހަނާއާއި ޖަވާހިރު ނަގާފައިވާއިރު މިތަކެތި އެއްވެސް ރަން ވިއްކާ ތަނަކަށް ވިއްކާނެ ކަމަށް ނުބެލެވޭކަމަށް އާސިމް ބުންޏެވެ. އެހެންކަމުން ބޮޑަށް ލަފާކުރެވެނީ މިތަކެތި ވިއްކުމަށް ދާނީ ޢާއްމުންނާ ދިމާއަށްކަމަށެވެ. އެހެންކަމުން ނުއަގުގައި ރަން ވިއްކުމަށް އެއްވެސް މީހަކު މަސައްކަތްކުރާކަން އިނގޭނަމަ އެކަން އޭނާއަށް ނުވަތަ ފުލުހުންނަށް އަންގައިދިނުމަށް އާސިމްވަނީ ޢާއްމުންގެ ކިބައިން އެދިފައެވެ. އެގޮތުން ރަނުގެ މަޢުލޫމާތު އޭނާއާއި ހިއްސާކުރާނަމަ 7776647 ނަމްބަރު މެދުވެރިކޮށް އެންގުމަށް އާސިމް އެދެއެވެ.
އަންގާރަ ދުވަހުގެ ފަތިހު 0430އާއި 0530އާއި ދޭތެރޭ ރަން ފިހާރަ ފަޅާލާފައިވަނީ ވަރަށް ބޮޑަށް އެކަމަށް ތައްޔާރުވެގެންނެވެ. އެގޮތުން އެހިސާބުގެ ގޯޅިއެއް ތެރެއިން ވަށް ބުރުގަލެއް އަޅައިގެން ދަނޑިއެއް ހިފައިގެން އައި އިސްކޮޅުން ދިގު ފިރިހެނަކު ފިހާރައިގެ ސީސީޓީވީ ކެމެރާތައް އަނބުރާ މަންޒަރު ފެންނަ ވީޑިއޯއެއް އެސަރަޙައްދުގައި ހުރި އެހެން ސީސީޓީވީ ކެމެރާއަކަށްވަނީ އަރާފައެވެ. ޢާއްމުކޮށް ފަތިސްގަޑީގައި މާލޭގެ މަގުތަކުގައި މީހުން ބައެއް ފަހަރު އުޅުނުނަމަވެސް މިދުވަސްވަރު ކާފިއުގެ ހިންގާފައި އޮތުމުގެ ސަބަބުން އެގަޑީގައި އެއްވެސް މީހަކު މަގުމަތީގައި ނޫޅޭކަން މިވީޑިއޯއިން ފެނިގެންދެއެވެ. މިވައްކަން ކުރި މީހާވަނީ ރަން ފިހާރައިގެ ދެފަރާތުގައި ހުރި ދެ ސީސީޓީވީ ކެމެރާވެސް އަނބުރާލާފައެވެ. ފިހާރައިގެ އެތެރޭގައި ކެމެރާއެއް ހަރުކޮށްފައި ނުހުންނާތީ އިތުރު ވީޑިއޯއެއް މިވަގުތު ނެތެވެ.
އާސިމް ބުނީ ވައްކަންކުރަން ފިހާރައަށް ވަދެފައިވަނީ ފިހާރައިގެ ދެތަޅު ހަލާކުކޮށްލައިގެންކަމަށެވެ. އަދި އެތެރޭގައި ހުރި ޝޯކޭސްތަކާއި ކަބަޑުތަކުގެ ތަޅުވެސް ހަލާކުކޮށްލާފައިވާކަމަށެވެ. އަދި ފިހާރާއިގެ ލިޔެކިޔުންތައް ހުރި ބްރިފްކޭސްވެސް ހަލާކުކޮށްލާ ލިޔެކިޔުންތައްވެސް ހަލާކުކޮށްފައިވާކަން އޭނާ ފާހަގަކުރިއެވެ. ފިހާރަ ބަންދުކުރާގަޑީގައި ކާޓަން ދަމާކަމަށާއި އެހެންކަމުން މީހަކަށް ނުފެންނާނެކަމުގެ ވަރަށް ޔަގީންކަމާއެކު ނިކަން ހަމަޖެހިގެންކުރި ވައްކަމެއްގެ ގޮތުގައި މިވައްކަން އާސިމް ސިފަކުރެއެވެ.
މިދުވަސްވަރަކީ މާލޭގައި ކާފިއު ވަގުތު ގިނަ ދުވަސްވަރެއްކަމުން ވައްކަމަށް ސަމާލުވާންޖެހެއެވެ. އަދި މިފަދަ އަގުބޮޑެތި ތަކެތީގެ ވިޔަފާރިކުރާ ފަރާތްތަކުން މުދަލާއި އެތަނެއް އިންޝުއަރކުރުމަކީ ވަރަށް މުހިއްމުކަމެކެވެ. އަދި މިފަދައިން ކުރާ ވައްކަމުގައި ވަގަށްނަގާ މުދާ ވިއްކުމަށް ޢާއްމުންނާ ހަމައަށް ދިޔުމުން އެކަން ރިޕޯޓުކުރުމަކީ ކޮންމެ މީހަކުވެސް އަމިއްލަ ޒިންމާއެއްކަމުގައި ދެކިގެން ކުރަންޖެހޭކަމެކެވެ.