ހަރުކަށި ފިކުރާ ޓެރެރިޒަމްއާ ގުޅިގެން ފުލުހުން ކުރިއަށް ގެންދިޔަ ޚާއްސަ އޮޕަރޭޝަން ތަކުގައި ހައްޔަރުކޮށްފައިވާ 10 މީހުންގެ ތެރެއިން އެކަކީ ރައީސް ނަޝީދަށް ދިން ހަމަލާއާ ގުޅުންހުރި މީހެއް ކަމަށް މޯލްޑިވްސް ޕޮލިސް ސަރވިސްއިން ހާމަކުރައްވައިފިއެވެ. އެހެންކަމުން ރައީސް ނަޝީދަށް ދިން ހަމަލާއާ ގުޅޭ 5 މީހުން މިހާތަނަށްވަނީ ދެނެގަނެވިފައެވެ.
ފުލުހުން ބޭއްވި ނޫސްވެރިންގެ ބައްދަލުވުމުގައި ފުލުހުން ވިދާޅުވީ ރައީސް ނަޝީދަށް އަމާޒުކޮށް ދިން ހަމަލާއާ ގުޅުންހުރި އިތުރު ބަޔަކު ވޭތޯ މިހާރުވެސް ތަހްޤީގުތައް ކުރަމުންދާކަމަށެވެ. އަދި މިތަޙްޤީގަށް އެކަށީގެންވާ ކުރިއެރުން ލިބެމުންދާ ކަމަށްވެސް ފުލުހުން ހާމަކުރެއްވިއެވެ. މިކަމުގެ ތަހުގީގަށް އޮސްޓްރޭލިއާގެ އެހީތެރިކަން ލިބެމުން އަންނަކަންވެސްވަނީ ހާމަކުރައްވާފައެވެ.
ނޫސްވެރިންގެ މިބައްދަލުވުމުގައި ވާހަކަދައްކަވަމުން ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ ހަރުކަށި ފިކުރާ ޓެރެރިޒަމްއާ ގުޅިގެން ފުލުހުން ކުރިއަށް ގެންދިޔަ ޚާއްސަ އޮޕަރޭޝަން ތަކުގައި ހައްޔަރު ކުރެވުނު ފަރާތްތަކުގެ ތެރޭގައި ރައީސް ނަޝީދަށް ދިން ބޮމުގެ ހަމަލާއާ ގުޅުންހުރި އެއް ފަރާތް ހިމެނިފައިވުމާއެކު އެކަން ތަހުޤީޤް ކުރެވެމުންދާކަމަށެވެ.
"ހަރުކަށި ފިކުރާ ޓެރެރިޒަމްއަށް ވާގިވެރިވާ ފަރާތްތަކަކީ ކޮބައިތޯ ބެލުމަށް އަޅުގަނޑުމެން ހިންގި ޚާއްސަ އޮޕަރޭޝަންގައި އަޅުގަނޑުމެންނަށް ހައްޔަރުކުރެވުނު ފަރާތްތަކުގެ ތެރޭގަ ރައީސް ނަޝީދަށް ދިން ބޮމުގެ ހަމަލާއާ ގުޅޭ އެއް ފަރާތެއް ހިމެނި އެ މައްސަލަ އަޅުގަނޑުމެން މިހާރު ކުރަމުންދާ ތަހުޤީޤު ތަކުގެ ތެރެއިން ކުރަމުންދާ ވާހަކަ ދަންނަވާލަން. އަޅުގަނޑުމެން ހިންގި އެ އޮޕަރޭޝަންއަކީ ރައީސް ނަޝީދަށް ދިން ބޮމުގެ ހަމަލާއާ ޓެރަރިޒަމްގާ ހަރަކާތްތެރިވާ ފަރާތްތަކާ އެއްވެސް ގުޅުމެއް އޮތްތޯ ބެލުމުގެ މަސައްކަތްތަކުގެ ތެރޭގައި ކުރެވުނު މަސައްކަތެއް." ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވިއެވެ.
ނޫސްވެރިންނަށް މަޢުލޫމާތު ދެއްވަމުން ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ މި ހަމަލާއާ ގުޅިގެން ކުރިއަށް ގެންދާ ތަހުޤީޤުގައި މިހާތަނަށް 150 އަށްވުރެ ގިނަ ފަރާތްތަކުގެ މަޢުލޫމާތު ހޯދިފަވާކަމަށެވެ. އަދި 25 ތަނެއް ބަލައި ފާސްކޮށްފައިވާކަމަށްވެސް ޝިފާއު ފާހަގަ ކުރަށްވާފައިވެއެވެ.
"މި ތަހުޤީޤުގެ ތެރެއިން މަޢުލޫމާތު ހިއްސާކޮށްފައިވާ 150އަށް ވުރެ ގިނަފަރާތްތަކުގެ މަޢުލޫމާތު ހޯދިފައިވޭ. އަދި އާންމު ރައްޔިތުންގެ ފަރާތުން އެއްކުރެވުނު މަޢުލޫމާތާ ފުލުހުންނަށް ލިބުނު މަޢުލޫމާތުތަކުގެ މައްޗަށް 25އަށް ވުރެ ގިނަ ތަންތަން ބަލާ ފާސްކޮށް އަދި 14 ފަރާތެއް ފުލުހުންގެ ބެލުމުގެ ދަށަށް ގެނެވިފާވާކަން އަޅުގަނޑު ފާހަގަކޮށްލަން" ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވިއެވެ.
ރައީސް ނަޝީދަށް ދިން ހަމަލާއަށް އެއްމަސް ހަމަވާ ދުވަހާއި ދިމާކޮށް ފުލުހުން ބޭއްވި ނިއުސްކޮންފަރެންސްގައި ރައީސް ނަޝީދުގެ ހަމަލާއާ ގުޅޭގޮތުން އިތުރު މާބޮޑު ތަފްސީލެއް ހާމަކޮށްފައެއް ނުވެއެވެ.
މި ހަމަލާއާއި ގުޅިގެން މިހާތަަނަށް ހައްޔަރުކުރި ހަތަރު މީހުންނަކީ މއ.ފޭރުގެ ޢުމުރުން 21 އަހަރުގެ މުޖާޒް އަޙްމަދާއި ގއ.ކޮނޑޭ ފޮޅޭމާގޭ ޢުމުރުން 32 އަހަރުގެ ތަހްމީނު އަޙްމަދާއި، ރައީސް ނަޝީދަށް ހަމަލާދިން ބޮން ގޮއްވާލީ ވ.ތިނަދޫ ހިޔާ ޢުމުރުން 25 އަހަރުގެ އަދުހަމް އަޙްމަދު ރަޝީދާއި ލ.ގަން / ދުންފިނި އުފާ، ޢުމުރުން 23 އަހަރުގެ އަހުމަދު ފާތިހެވެ. މީގެތެރެއިން އަދުހަމް އަޙްމަދަކީ ރައީސް ނަޝީދަށް ހަމަލާދިނުމަށް ސައިކަލްގައި ހަރުކޮށްފައި އޮތް ބޮން ގޮއްވާލުމުގައި އަމަލީ ގޮތުން ބައިވެރިވި މީހާއެވެ. ފުލުހުން އާއްމުކުރި ވީޑިއޯ ފުޓޭޖްތަކަށް ބަލާއިރު މީނާ މިކަން ކޮށްފައިވަނީ ރައީސް ނަޝީދަށް ފާރަލައިގެން ފިލާ ހުރެކަން އެގެއެވެ. ދެން މި މައްސަލާގައި ހަރަުކޮށްފައިވާ ތަހްމީނު އަޙްމަދަކީ ބޮން ހަރުކޮށް ގޮއްވާލި ސައިކަލްގެ ވެރި ފަރާތެވެ.
ފުލުހުން ވިދާޅުވީ މި މައްސަލާގައި ހަމަލާދިނުމުގައި ބައިވެރިވި މީހުންގެ އިތުރުން މި ހަމަލާދިނުމުގެ ފަހަތުގައި ތިބެ އެކަމަށް ހަރަދުކުރީ ކޮންބައެއްތޯވެސް ހޯދާނެކަމަށެވެ. އަދި މިކަމަށް ފަންޑުކުރި މީހުން ހޯދުމަށް ރައީސް ނަޝީދުވެސް ވަނީ ގޮވާލައްވާފައެވެ.
ރައީސް ނަޝީދަށް ދިން ނުރައްކާތެރި ހަމަލާގައި އެމަނިކުފާނަށް ސީރިއަސް ޒަހަމްތަކެއް ލިބިވަޑައިގެން ގިނަ އޮޕަރޭޝަންތަކެއް ވަނީ ކޮށްފައެވެ. އަދި އެ ޒަހަމްތަކަށް އޭޑީކޭގައި ފަރުވާ ހޯއްދެއްވުމަށްފަހު ޖަރުމަންވިލާތަށް ވަޑައިގެން އިތުރު ފަރުވާ ވަނީ ހޯއްދަވާފައެވެ. އަދި އަންނަ މަހު އެނބުރި ރާއްޖެ ވަޑައިގެންނެވޭވަރު ވާނެކަން ރައީސް ނަޝީދު ވަނީ ހާމަކުރައްވާފައެވެ.