ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ދިން ހަމަލާއާއި ގުޅިގެން މަޖިލީހުން ކުރިއަށްގެންދާ ޕާލިމަންޓްރީ އިންކުއަރީއަށް ކައުންޓަ ޓެރަރިޒަމްގެ ޑިރެކްޓަރު ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލްވެސް ހާޒިރުކޮށްފިއެވެ. މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީއަށް ފަރީދު ޙާޒިރުކުރި ނަމަވެސް އިތުރު ތަފްސީލެއް ނުލިބެއެވެ. ކޮމިޓީން ކުރިއަށްގެންދާ ބައްދަލުވުންތައް ވަނީ ސިއްރުކޮށްފައެވެ.
ސަލާމަތީ ޚިދުމަތްތަކުގެ ކޮމިޓީއަށް ކައުންޓަ ޓެރަރިޒަމްގެ ޑިރެކްޓަރު ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލް ޙާޒިރުކޮށްފައިވާއިރު، މިއަދު ވަނީ ސީޕީ މުޙައްމަދު ހަމީދުވެސް ޙާޒިރުކޮށްފައެވެ. އެކޮމިޓީއަށް ފުލުހުންގެ އިސް 5 ބޭފުޅަކު ޙާޒިރުކުރާނެ ކަމަށް މަޢުލޫމާތު ލިބެއެވެ. ނަމަވެސް ކޮމިޓީގެ ބައްދަލުވުން ކުރިއަށްގެންދަނީ ސިއްރުކޮށްގެންނެވެ.
ވަކިވަކި ފުލުހުން ކޮމިޓީއަށް ޙާޒިރުވިނަމަވެސް އެމްއެންޑީއެފް އިން ވަނީ ވަކިވަކި ސިފައިން ކޮމިޓީއަށް ޙާޒިރުވުމުގެ ބަދަލުގައި، މަޖިލީހަށް ޖަވާބުދާރީވާނީ ސިފައިންގެ މުއައްސަސާއިން ކަމަށް ވިދާޅުވެފައެވެ. އެމްއެންޑީއެފް އިން ވިދާޅުވީ، ސަލާމަތީ ޚިދުމަތެއްގެ ކަންކަމާ ގުޅިގެން ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ޖަވާބުދާރީވަނީ ސަލާމާތީ ޚިދުމަތްތަކާ ޙަވާލުވެ ހުންނަވާ ވަޒީރުކަމަށް ޤާނޫނުގައި ބަޔާންކޮށްފައިވާކަމަށެވެ.
ރައީސް ނަޝީދަށް ދިންހަމަލާއާއި ގުޅޭ އިންކުއަރީއެއް ސަލާމަތީ ޚިދުމަތްތަކުގެ ކޮމިޓީން ހަދަމުންދާއިރު، އެކޮމިޓީގެ މުގައްރިރު، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވީ، މި ހާދިސާގެ އެންމެ ފުނަށް ކޮމިޓީން ދާނެކަމަށެވެ. އަދި ކޮމިޓީއަށް ހާޒިރުކުރަންޖެހޭ ފަރާތްތައް ޙާޒިރުކުރަމުންދާނެކަމަށްވެސް އަސްލަމް ވިދާޅުވެފައިވެއެވެ.