ހަރުކަށި ފިކުރު ފެތުމުގައި އިސްކޮށް ހަރަކާތްތެރިވާކަމަށް ތުހުމަތުކުރެވޭ މީހަކު ހައްޔަރުކޮށްފިއެވެ. ފުލުހުން ވިދާޅުވީ އުމުރުން 49 އަހަރުގެ މިމީހާ ހައްޔަރުކުރީ މާލެއިން ކަމަށެވެ. އަދި މީ ދިވެހި ފިރިހެނެއްކަމަށްވެސް ފުލުހުން ވިދާޅުވެއެވެ. މި މީހާއާއި ގުޅޭ އެއްވެސް ތަފްސީލެއް ފުލުހުން ހާމަކޮށްފައެއް ނުވެއެވެ.
ސަލާމަތީ ބާރުތަކުން އައްޑޫ ސިޓީގައި ޓެރަރިޒަމްއާއި ދެކޮޅަށް ހިންގި ހަރާކާތެއްގައިވެސް މި މަހުގެ 15 ވަނަދުވަހު ވަނީ 7 މީހަކު ހައްޔަރުކޮށްފައެވެ. މި މީހުންގެވެސް މައުލޫމާތެއް އަދި ފުލުހުން ހާމައެއް ނުކުރައްވައެވެ.
މިމަހުގެ 6 ވަނަދުވަހުގެ ރޭ އެއްޗެއް ނުރައްކާތެރި އެއްޗެއް ގޮއްވާލާ ބަޔަކުވަނީ ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން މަސައްކަތްކޮށްފައެވެ. މި ހަމަލާގައި އެމަނިކުފާނަށް ބޮޑެތި ސީރިއަސް ޒަހަމްތަކެއް ލިބިވަޑައިގެން ގިނަ ސާޖަރީތަކެއް ވަނީ ހަދާފައެވެ. ރައީސް ނަޝީދަށް ހަމަލާދިނުމަށް ބޭނުންކުރި ބޮން ހަދާފައިވަނީ ގިނަ އަދަދެއްގެ ރޭޒާފުކާއި އެހެނިހެން ގެއްލުންދޭ ތަކެތި ހިމަނައިގެންކަމުން މި ބޮން ގޮއްވާލުމާއި އެކު މިތަކެތިވަނީ ރައީސް ނަޝީދުގެ ހަށިކޮޅުގެ ތެރެއަށް ވަދެފައެވެ. މިތަކެތި ނެގުމަށް ޑޮކްޓަރުންގެ ޓީމުންވަނީ 16 ގަޑިރުވަންދެން ސީރިއަސް އޮޕަރޭޝަންތަކެއް ކޮށްފައެވެ.
މި ހަމަލާއަށް ފަހު ސަލާމަތީ ބާރުތަކުން އަންނަނީ ބާރުތަކުން ގެންދަނީ ހަތިޔާރާއެކު ރާއްޖޭގެ އެކި ސަރަހައްދުތަކުގައި ހަރަކާތްތެރިވަމުންނެވެ. އަދި އެލާޓް ލެވެލްވެސް ވަނީ މަތިކޮށްފައެވެ.
ރައީސް ނަޝީދަށް ހަމަލާދިން މައްސަލާގައި މިހާތަނަށް 3 މީހަކު ވަނީ ހައްޔަރުކޮށްފައެވެ. އަދި މި މީހުންގެ ބަންދަށް ކޯޓުން ވަނީ 15 ދުވަސް ޖަހާދީފައެވެ. މި މައްސަލާގައި ހައްޔަރުކުރި މީހުންގެ ތެރޭގައި ބޮން ގޮއްވާލުމުގައި އަމަލީ ގޮތުން ހަރަކާތްތެރިވި މީހާއާއި ބޮން ހަރުކޮށް ގޮއްވާލި ސައިކަލްގެ ވެރިފަރާތް ހިމެނެއެވެ.
ރައީސް ނަޝީދަށް ހަމަލާދިނުމުގައި ބައިވެރިވި މީހުންނާއި އެކަމުގައި ފަންޑުކުރި މީހުން ހޯދާ އިންސާފުގެ ކުރި މައްޗަށް ގެންނާނެކަމުގެ ޔަޤީންކަން ފުލުހުންނާއި ކަމާއި ގުޅޭ އިދާރާތަކުން ވަނީ ދެއްވާފައެވެ.