ކޯވިޑް-19 ފެތުރުން ހުއްޓުވުމަށް ސަޢުދީ ޢަރަބިއްޔާގައި އަޅާފައިވާ ރައްކާތެރިކަމުގެ ފިޔަވަޅުތަކާ ޚިލާފުވާ މީހުން ބޮޑެތި ޢަދަދުތަކުން ޖޫރިމަނާކުރުމަށް ނިންމައިފިއެވެ. އެ ޤައުމުން އެފަދަ ހަރުކަށި ފިޔަވަޅެއް އެޅުމަށް ނިންމީ ކުރިއަށްއޮތް ފިޠުރު ޢީދާ ދިމާކޮށް ބަލިފެތުރޭ މިންވަރު އިތުރުވުން ހުއްޓުވުމަށެވެ
.
ސަޢުދީ ޢަރަބިއްޔާގައި މިހާތަނަށް 428،369 މީހުންނަށް ކޯވިޑް-19 ޖެހި 7،098 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި އެ ޤައުމުގައި 999 މީހުންނަށް ބަލިޖެހި 13 މީހުންވަނީ މަރުވެފައެވެ.
ސަޢުދީ ޢަރަބިއްޔާގެ ދާޚިލީ ވުޒާރާއިން ބުނީ ޤަވާއިދާ ޚިލާފުވާ މީހުން 2،666އާއި 13،333 އެމެރިކާ ޑޮލަރާ ދެމެދުގެ ޢަދަދަކުން ޖޫރިމަނާކުރާނެކަމަށެވެ. އަދި ޤަވާއިދާ ޚިލާފުވާ ވިޔަފާރިތައް 2،666އާއި 26،666 އެމެރިކާ ޑޮލަރާ ދެމެދުގެ ޢަދަދަކުން ޖޫރިމަނާކުރާނެކަމަށްވެސް އެ ވުޒާރާއިންވަނީ ބުނެފައެވެ. ބޮޑެތި ޖޫރިމަނާތަކެއްކުރަން ސަޢުދީ ޢަރަބިއްޔާއިން ނިންމީ ޤަވާއިދާ ޚިލާފުވާ ފަރާތްތަކާ ދެކޮޅަށް އެޅުމަށް މިދިޔަ އަހަރުގެ ތެރޭގައި ކަނޑައަޅައި ޢަމަލުކުރަމުންދާ ފިޔަވަޅުތަކުގެ އިތުރުންނެވެ.
އަލަށް އިޢުލާނުކުރި ފިޔަވަޅުތަކުގެ ދަށުން ކަނޑައެޅިފައިވާ އުޞޫލުތަކާ ޚިލާފަށް ގޭގޭގައި ޢާއިލީ ބައްދަލުވުންތައް ބާއްވާނަމަ އެ ބައްދަލުވުންތަކަށް ހާޒިރުވާ މީހުންގެ އިތުރުން ބައްދަލުވުން އިންތިޒާމުކުރި މީހުންނާއި އެ ބައްދަލުވުން ބޭއްވި ތަނުގެ ވެރިމީހާ ޖޫރިމަނާކުރާނެއެވެ. އެފަދަ ބައްދަލުވުންތަކަކީ ޢާއިލީ ބައްދަލުވުންތަކެއް ނޫންނަމަ ޖޫރިމަނާކުރާ މިންވަރު އިތުރުވާނެއެވެ. އަދި ޖަނާޒާތަކާއި ޕާޓީތައްފަދަ ބައްދަލުވުންތައް ބާއްވައިފިނަމަ ޢަދަބެއްގެ ގޮތުގައި ބޮޑު ޖޫރިމަނާއެއްވަނީ ކަނޑައަޅައިފައެވެ. އޭގެ އިތުރުން މަސްޖިދުލް ޙަރާމުގައި ޙުއްދަނެތި ނަމާދުކުރަން މަސައްކަތްކުރާ މީހުންވެސް ޖޫރިމަނާކުރާނެއެވެ.
ޤަވާއިދާ ޚިލާފުވާ އަމިއްލަ ކުންފުނިތަކާ ދެކޮޅަށްވެސް ހަރުކަށި ފިޔަވަޅުތަކެއް އަޅާނެކަމަށް އެ ޤައުމުގެ ސަރުކާރުން ބުނެއެވެ. އެފަދަ ކުންފުނިތަކުން ތަކުރާރުކޮށް ޤަވާއިދާ ޚިލާފުވާނަމަ ޤާނޫނީ ފިޔަވަޅު އެޅުމަށްވެސްވަނީ ނިންމައިފައެވެ.