އަފްޣާނިސްތާނުގައި ތިބި ނޭޓޯގެ ސިފައިން އެ ޤައުމުން ބޭލުމުގެ މަސައްކަތް ފަށައިފިއެވެ.
އެމެރިކާގެ ކުރީގެ ރައީސް ޑޮނަލްޑު ޓުރަންޕުގެ ސަރުކާރުންވަނީ ޠާލިބާނުންނާއެކު ޞުލްޙައިގެ އެއްބަސްވުމެއްގައި މިދިޔަ އަހަރުގެ ފެބްރުއަރީ މަހުގެ ތެރޭގައި ސޮއިކޮށްފައެވެ. އެ އެއްބަސްވުމުގެ ދަށުން އަންނަ މެއި މަހުގެ 1ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާގެ ސިފައިން ބާލަން ޖެހެއެވެ. އެ އެއްބަސްވުމުގެ ދަށުން ފާއިތުވި އަހަރުގެ ތެރޭގައި އަފްޣާނިސްތާނުގައި ތިބި އެމެރިކާގެ ގިނަ ޢަދަދެއްގެ ސިފައިންވަނީ އަނބުރާ ޤައުމަށް ގެންގޮސްފައެވެ. ނަމަވެސް 2،500އެއްހާ އެމެރިކާގެ ސިފައިން އަދިވެސް އަފްޣާނިސްތާނުގައި އެބަ ތިއްބެވެ. ސެޕްޓެމްބަރު މަހުގެ 11ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާގެ ސިފައިން އަނބުރާ ގެންދަވާނެކަމަށް އެމެރިކާގެ މިހާރުގެ ރައީސް ޖޯ ބައިޑަންވަނީ އިޢުލާނުކުރައްވައިފައެވެ. އަފްޣާނިސްތާނުގައި ތިބި ނޭޓޯގެ ފައުޖުތައްވެސް ސެޕްޓެންބަރު މަހުގެ 11ވަނަ ދުވަހުގެ ކުރިން އެ ޤައުމުން ބޭލުމަށް ނޭޓޯގެ މެންބަރު ޤައުމުތަކުންވަނީ ނިންމައިފައެވެ.
ހުޅަނގުގެ އަސްކަރީ އިއްތިޙާދުކަމަށްވާ ނޭޓޯއިން ބުނީ އޭޕްރިލް މަހުގެ މެދުތެރޭގައި ނިންނި ނިންމުމާ އެއްގޮތަށް އަފްޣާނިސްތާނުގައި ތިބި ނޭޓޯގެ 9،600 ސިފައިން އަނބުރާ ގެންދިޔުމުގެ މަސައްކަތް ފަށާފައިވާކަމަށެވެ. އަފްޣާނިސްތާނުގައި ތިބި ސިފައިން އަނބުރާ ގެންދިޔުމުގައި އެ މީހުންގެ ރައްކާތެރިކަން ޔަޤީންކުރުމަށް ޚާއްޞަ އިސްކަމެއް ދޭނެކަމަށް އެ އިއްތިޙާދުން ބުނެއެވެ. އެ ޙާލަތުގައި ޠާލިބާނުން އެއްވެސް ޙަމަލާއެއް ދީފިނަމަ އޭގެ ބަދަލުގައި ޙަމަލާ ދޭނެކަމަށްވެސް ނޭޓޯއިން ބުނެއެވެ. ސިފައިން އަނބުރާ ގެންގޮސް ނިމޭނެ ތާރީޚެއް ނުބުނި ނަމަވެސް ކުރިއަށް އޮތް މަސްތަކުގައި އެ މަސައްކަތް ނިންމާލެވޭނެކަމަށް ނޭޓޯއިން ބުނެއެވެ.