ކޯވިޑް-19ގެ ސަބަބުން ޙާލަތު ގޯސްވެފައިވާ އިންޑިޔާއަށް ދޭނެ ވެކްސިނެއް ނެތްކަމަށް އިނގިރޭސިވިލާތުން ބުނެފިއެވެ.
އެމެރިކާއަށްފަހު ދެވަނައަށް އެންމެ ގިނަ ޢަދަދެއްގެ މީހުންނަށް ކޯވިޑް-19 ޖެހިފައިވަނީ އިންޑިޔާގައެވެ. އެ ޤައުމުގައި މިހާތަނަށް 18.3 މިލިޔަނަށްވުރެ ގިނަ މީހުންނަށް ބަލިޖެހި 204،812 މީހުންވަނީ މަރުވެފައެވެ. ފާއިތުވި ހަފުތާތަކުގައި އެ ޤައުމުގައި ބަލިޖެހޭ މީހުންގެ ޢަދަދު ވަރަށް ބޮޑަށް އިތުރުވެ އެ ޤައުމުގެ ޞިއްޙީ ނިޒާމަށްވަނީ ވަރަށް ބޮޑަށް ބާރުބޮޑުވެފައެވެ. ހަސްފަތާލުތަކުގެ އެނދުތައް ފުރި އޮކްސިޖަނާއި ބޭސްފަދަ ތަކެތި ލިބުމުގައި ސްޓޭޓުތަކުންދަނީ ދަތިތަކާ ކުރިމަތިލަމުންނެވެ. މި ޙާލަތުގައި ރަޙުމަތްތެރި ޤައުމުތަކުންދަނީ އިންޑިޔާއަށް އެހީތެރިކަން ފޯރުކޮށްދެމުންނެވެ.
އިނގިރޭސިވިލާތުގެ ޞިއްޙަތާބެހޭ ވަޒީރު މެޓު ހެންކޮކު ވިދާޅުވީ އިނގިރޭސިވިލާތުގެ ފަރާތުން އިންޑިޔާއަށް ވެންޓިލޭޓަރާއި އޮކްސިޖަން ކޮންސެންޓުރޭޓަރު ފޯރުކޮށްދީފައިވާކަމަށެވެ. ނަމަވެސް އިންޑިޔާއަށް ފޯރުކޮށްދެވޭ ވަރަށް އިނގިރޭސިވިލާތުގައި ކޯވިޑް-19ގެ ވެކްސިން ނެތްކަމަށް އޭނާ ވިދާޅުވިއެވެ.
އިނގިރޭސިވިލާތުގެ ސަރުކާރުންވަނީ އިންޑިޔާއަށް ދޭނެ ވެކްސިން އިނގިރޭސިވިލާތުގައި ނެތްކަމަށް ބުނެފައެވެ. އިނގިރޭސިވިލާތުން އިސްކަން ދެނީ އެ ޤައުމުގެ ރައްޔިތުންނަށް ވެކްސިން ދިނުމަށްކަމަށްވެސް އެ ޤައުމުގެ ސަރުކާރުންވަނީ ބުނެފައެވެ. ނަމަވެސް އަމިއްލަ ޤައުމުގެ ރައްޔިތުންނަށް ދިނުމަށްފަހު ބާކީވާ ވެކްސިން ޑަބުލޔުއެޗުއޯ މެދުވެރިކޮށް ބޭނުން ޖެހިފައިވާ އެހެން ޤައުމުތަކަށް ދޭނެކަމަށްވެސް އިނގިރޭސިވިލާތުން ބުނެއެވެ.