އިންފޮމޭޝަން ކޮމިޝަނަރުގެ މަޤާމަށް އައްޔަންކުރެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރައްޔިތުންގެ މަޖިލީހަށް ފޮނުއްވާފައިވާ ތިން ނަމެއް ދިރާސާކުރުމުގެ މަސައްކަތް ރައްޔިތުން މަޖިލީހުން ފަށައިފިއެވެ.
ކޮމިޝަނަރަށް އައްޔަންކުރެއްވުމަށް ރައީސް ފޮނުއްވި ނަން
1- އަލްއުސްތާޛް ޝިހާމް މުޙައްމަދު ވަޙީދު/ ދަފްތަރު ނަންބަރު ރސ 5143
2- އަލްއުސްތާޛް އަޙްމަދު އާހިދު ރަޝީދު/ ހ.ގުރުވަ
3- މަރްޔަމް އަލީމް/ ގ.ދާސްތާން
މި ނަންތައް ދިރާސާކުރުމަށް މަޖިލީހުން ފޮނުވާފައިވަނީ މިނިވަން މުއައްސަސާތަކުގެ ކޮމިޓީއަށެވެ.
ކޮމިޝަނަރކަމަށް އައްޔަންކުރެއްވުމަށް ރައީސް ފޮނުއްވި ނަންތަކުގެ ތެރެއިން ލިސްޓުގެ އެންމެ ކުރީގައިވާ ޝިހާމް މުޙައްމަދު ވަޙީދަކީ ކުރިން ނޫސްވެރިކަން ކުރައްވާފައިވާ ބޭފުޅެކެވެ. އަދި ވީމީޑިއާގެ ސީއީއޯގެ މަޤާމުވެސް ފުރުއްވާފައިވެއެވެ. މީގެއިތުރުން ޑރ ވަހީދުގެ ވެރިކަމުގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރުކަމުގެ މަޤާމުވެސް ފުރުއްވާފައިވއެވެ.
އިންފޮމޭޝަން ކޮމިޝަނަރުގެ މަޤާމު ހުސްވީ ކުރިން އެ މަޤާމުގައި ހުންނެވި ތ.ވިލުފުށި، އަތަމާގެ، ޙުސައިން ފިޔާޒް މޫސާ މިދިޔަ މާރިޗު މަހުގެ21 ވަނަ ދުވަހު އިސްތިއުފާދެއްވާފައިވާތީއެވެ.
އިންފޮމޭޝަން ކޮމިޝަނަރަކީ (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުން މަތިކޮށްފައިވާ ޒިންމާތަކާއި، ކަމާ ބެހޭ އެހެނިހެން ޤާނޫނުތަކާއި ގަވާއިދުތަކުގެ ދަށުން އުފުލަން ޖެހޭ ޒިންމާތަކުގެ ބޭނުމަށް ސީދާ ރައްޔިތުންގެ މަޖިލީހަށް ޖަވާބުދާރީ ވާންޖެހޭ މިނިވަން ބޭފުޅެކެވެ.
އިންފޮމޭޝަން ކޮމިޝަނަރުގެ އޮފީހަކީ، މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން ރައްޔިތުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ޢައްޔަނުކުރައްވާފައިވާ އިންފޮމޭޝަން ކޮމިޝަނަރުގެ މަސްއޫލިއްޔަތު އަދާކުރުމަށްޓަކައި 13 ޖުލައި2014 ގައި ރައީސުލްޖުމްހޫރިއްޔާ އުފައްދަވާފައިވާ އޮފީހެކެވެ.