އެމްއެމްޕީއާރުސީގެ ބޮޑު ހިޔާނާތުގައި ހިމެނޭ އެއްވެސް މީހަކަށް އެމްޑީޕީގެ އެތެރޭގެ އިންތިޙާބުގައި ވާދަނުކުރެވޭ ގޮތަށް އެ ޕާޓީން ނިންމައިފިއެވެ. އެމްޑިޕީގެ އެތެރޭގެ އިންތިޙާބު މިމަހުގެ 29 ގައި ބާއްވަން ނިންމާ ނަން ހުށައެޅުމުގެ ފުރުސަތު މިހާރު ވަނީ ހުޅުވާލާފައެވެ.
އެމްޑީޕީން ރޭ ބޭއްވި އެޕާޓީގެ ހިންގާ ކޮމެޓީގެ ބައްދަލުވުމުގައި ރައީސުލްޖުމްހޫރިއްޔާ ރައީސް އިބްރާހިމް މުހައްމަދު ޞާލިހާއި އެމްޑީޕީގެ ރައީސް މުހައްމަދު ނަޝީދު ބައިވެރިވެ ވަަޑައިގެންނެވިއެވެ. މި ބައްދަލުވުމުގައި ކުރިޔަށް އޮތް އެތެރޭގެ އިންތިޚާބުގައި ވާދަކުރާ ފަރާތްތަކުގެ ހުންނަން ޖެހޭ ޝަރުތުތައް ކަނޑައަޅާފައެވެ.
މިގޮތުން އެމްއެމްޕީއާރުސީގެ ބޮޑު ހިޔާނާތުގައި މައްސަލާގައި ތުހުމަތުކުރެވޭ އެއްވެސް މީހަކަށް ިއންތިޙާބުގައި ވާދަނުކުރެވޭ ގޮތަށް ވަނީ ފާސްކޮށްފައެވެ. މީގެއިތުރުން މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން އާއްމުކޮށްފައިވާ އެއްވެސް ލިސްޓެއްގައި ހިމެނޭ އެއްވެސް މީހަކަށްވެސް އިންތިޙާބުގައި ވާދަނުކުރެވޭނެކަމަށް ވަނީ ކަނޑައަޅާފައެވެ. މީގެއިތުރުން ރޭފްކުރުމާއި ކުޑަކުދިންނަށް ޖިންސީ ގޯނާކުރުމުގެ ކުށް ކޮށްފައިވާ މީހުންނަށްވެސް އިންތިޙާބުގައި ފުރުސަތެއް ނޯންނާނެއެވެ.
ރައްޔިތުން މަޖިލީހުގެ މާފަންނު މެދު ދާއިރާގެ މެމްބަރު މެމްބަރު އިބްރާހިމް ރަޝީދު (ބޮންޑޭ) ހުށައެޅުއްވި މި ހުށައެޅުން ފާސްވީ 68 މެމްބަރުންގެ ތާއިދާއެކުއެވެ.
މީގެއިތުރުން ޕާޓީގެ މެމްބަރަކަށްވީތާ އެއް އަހަރު ނުވާ މީހުންނަށްވެސް އެތެރޭގެ އިންތިޙާބުގައި ވާދަނުކުރެވޭނެކަމަށް އެމްޑީޕީގެ ހިންގާ ކޮމެޓީން ވަނީ ފާސްކޮށްފައެވެ. މި ހުށައެޅުން ފާސްވީ ބައްދަލވުމުގައި ބައިވެރިވި މެމްބަރުންގެ ތެރެއިން 69 މެމްބަރުންގެ ވޯޓާއެކުއެވެ.
ދާއިރާއެއްގެ ރައީސްކަމަށް ވާދަކުރާނަމަ އެ ދާއިރާއަށް ނިސްބަތްވާ އެމްޑީޕީގެ 50 މީހުންގެ ސޮއި ހަމަކުރަން ޖެހޭގޮތަށްވެސް ވަނީ ކަނޑައަޅާފައެވެ. އަދި ޕްރޮވިންސް ނުވަތަ ސިޓީއެއްގެ ރައީސްކަމަށް ވާދަކުރާނަމަ 200 މެންބަރުންގެ ސޮއި ހޯދަން ޖެހޭނެކަމަށްވެސް ހިންގާ ކޮމެޓީން ވަނީ ނިންމާފައެވެ.
މިމަހުގެ 29 ގައި ބާއްވާ ދާއިރާތަކުގެ އިންތިޙާބުގައި ވޯޓްލެވޭނީ މިމަހުގެ 18 ވަނަ ދުވަހުގެ ނިޔަލަށް އެމްޑީޕީން ބަލަހައްޓާ އެތެރޭގެ ދަފްތަރުގައި ރަޖިސްޓްރީވެފައިވާ މީހުންނަށްކަމަށް އެމްޑީޕީން ބުނެއެވެ. މި ދަފްތަރުގައި މިވަގުތު 93354 މީހުން ރަޖިސްޓްރީވެފައިވާކަމަށްވެސް އެމްޑީޕީން ބުނެއެވެ.
އެމްޑީޕީގެ އެތެރޭގެ އިންތިޙާބުގައި ދާއިރާތަކަށް ވާދަކުރުމުގެ ކެމްޕެއިންތައްވަނީ މިހާރުވެސް ފަށާފައެވެ. މި އިންތިޙާބުގައި މާލޭ ދާއިރާގެ ރައީސްކަމަށް ވާދަކުރާނެކަމަށް އިއުލާންކޮށްފައިވާ ކެނޑިޑޭޓުންގެ ތެރޭގައި މާލޭ ސިޓީ ކައުންސިލްގެ މިހާރުގެ މޭޔަރ ސިފާ މުހައްމަދާއި ޕްލޭނިން މިނިސްޓްރީގެ ސްޓޭޓް މިނިސްޓަރ އަދި މިހާރުވެސް މާލެ ދާއިރާގެ ރައީސްކަން ކުރައްވާ އަކްރަމް ކަމާލުއްދީން ހިމެނިވަޑައިގަންނަވައެވެ. މި ދާއިރާގެ ވާދަވެރިކަން ޕާޓީގެ ތެރޭގައިވެސް ވަނީ ބޮޑުވެފައެވެ.