އިންޑިޔާގައި ކޯވިޑް-19 ފެތުރޭ މިންވަރު ދަށްކުރުމަށް ޢާންމުން އެއްވެއުޅުމާއި އެއްތަނުން އަނެއްތަނަށް ދަތުރުކުރުން މަދުކުރަންޖެހޭކަމަށް ދުނިޔޭގެ ޞިއްޙަތު ޖަމްޢިއްޔާ، ޑަބުލިޔުއެޗުއޯއިން ބުނެފިއެވެ.
އެމެރިކާއަށްފަހު ދެވަނައަށް އެންމެ ގިނަ ޢަދަދެއްގެ މީހުންނަށް ކޯވިޑް-19 ޖެހިފައިވަނީ އިންޑިޔާގައެވެ. އެ ޤައުމުގައި މިހާތަނަށް 16.2 މިލިޔަން މީހުންނަށް ބަލިޖެހި 186،928 މީހުންވަނީ މަރުވެފައެވެ. ފާއިތުވި ހަފުތާތަކުގައި އެ ޤައުމުގައި ބަލި ފެތުރޭ މިންވަރުވަނީ ވަރަށް ބޮޑަށް އިތުރުވެފައެވެ. އެގޮތުން ފާއިތުވި 24 ގަޑިއިރުގެ ތެރޭގައި އެ ޤައުމުގައި 345،147 މީހުންނަށް ބަލިޖެހި 2،621 މީހުންވަނީ މަރުވެފައެވެ. އެއީ އެއް ދުވަހުގެ ތެރޭގައި އެއް ޤައުމެއްގައި އެންމެ ގިނަ ޢަދަދެއްގެ މީހުންނަށް ބަލިޖެހުނު ޢަދަދެވެ. ބަލިޖެހޭ މީހުންގެ ޢަދަދު އެހާ ބޮޑަށް އިތުރުވުމުން އެ ޤައުމުގެ ޞިއްޙީ ނިޒާމަށް ބާރުބޮޑުވެ ބަލިމީހުންނަށް ފަރުވާދިނުމުގައި ދަތިތަކާ ކުރިމަތިލާންވަނީ ޖެހިފައެވެ. އަދި ބަލިމީހުންނަށް ފަރުވާދިނުމަށް ބޭނުންވާ އޮކްސިޖަނާއި ބޭސްފަދަ ތަކެތި ލިބުމުގައި ދަތިތަކެއްވަނީ ކުރިމަތިވެފައެވެ.
އިންޑިޔާގެ ޙާލަތާގުޅޭގޮތުން ވާހަކަދައްކަވަމުން ޑަބުލިޔުއެޗުއޯ ކުއްލި ޙާލަތްތަކާބެހޭ އިސްވެރިޔާ މައިކް ރަޔަން ވިދާޅުވީ އިންޑިޔާގައި ބަލިފެތުރޭ މިންވަރު ދަށްކުރުމަކީ ވަރަށް އުނދަގޫކަމަކަށް ވާނެކަމަށެވެ. ނަމަވެސް ކޮންމެވެސް ގޮތަކުން އާންމުން އެކަކު އަނެކަކާ ބައްދަލުވާ މިންވަރު ދަށްކުރަންޖެހޭކަމަށް އޭނާ ވިދާޅުވިއެވެ. އެފަދަ ފިޔަވަޅުތަކެއް އެޅުމަށް އިންޑިޔާގެ ސަރުކާރުން މަސައްކަތްކުރާކަމަށްވެސް އޭނާ ފާހަގަކުރެއްވިއެވެ.
އިންޑިޔާގެ ޙާލަތާމެދު ޑަބުލިޔުއެޗުއޯގެ ޑިރެކްޓަރ ޖެނެރަލް ޓެޑުރޮސް އަދަނޮމް ގެބްރިޔޭސުސްވެސްވަނީ ކަންބޮޑުވުން ފައުޅުކުރައްވައިފައެވެ. އެނާ ވިދާޅުވީ އިންޑިޔާއަށް ކުރިމަތިވެފައިވާ ޙާލަތުން ކޯވިޑް-19ގެ ނުރައްކާތެރިކަން އިތުރަށް ސާފުވާކަމަށެވެ.