ސޫރިޔާގައި ހުންނަ އީރާނުގެ މިސައިލާއި ހަތިޔާރު އުފައްދާ މަރުކަޒުތަކަށް އިސްރާއީލުން ދެމުންދާ ވައިގެ ޙަމަލާތައް އިތުރުކޮށްފިއެވެ.
ހުޅަނގުގެ ޤައުމުތަކާއި ސަރަޙައްދީ ޖާސޫސީ މަސްދަރުތަކުން ބުނާގޮތުގައި އިސްރާއީލުން މަސައްކަތްކުރަނީ ސޫރިޔާގެ ބިމާއި ވަޞީލަތްތައް އީރާނުން ބޭނުންކޮށް ފައިދާ ހޯދުން ހުއްޓުވުމަށްކަމަށެވެ. ސޫރިޔާއާއި އީރާނާ ދެމެދު އޮންނަ ޒަމާންވީ ގާތްގުޅުމުގެ ސަބަބުން ސޫރިޔާގައި ޤާއިމުކޮށްފައިވާ ބިންގަރާސްތަކުގައި އީރާނުގެ މިސައިލާއި ހަތިޔާރު އުފެއްދުމުގެ މަސައްކަތްތައް ކުރަމުންދާކަމަށް ހުޅަނގާއި އިސްރާއީލުގެ ޖާސޫސީ މަސްދަރުތަކުން ބުނެއެވެ.
ސޫރިޔާގައި ކުރަމުންދާ ދާޚިލީ ހަނގުރާމައިގައި އެ ޤައުމުގެ ރައީސް ބައްޝާރުލް އަސަދުގެ ސަރުކާރަށް ވާގިވެރިވުމަށް ލުބުނާނާއި ޢިރާޤާއި އަފްޣާނިސްތާނުން ގިނަ ޢަދަދެއްގެ ހަނގުރާމަވެރިން އެތެރެވި ނަމަވެސް އެކަން ހުއްޓުވުމަށް އިސްރާއީލުން މަސައްކަތްކޮށްފައެއް ނުވެއެވެ. އިސްރާއީލުން އޭރު ކޮށްފައިވާ ހަމައެކަނި މަސައްކަތަކީ އީރާނުން ވާގިވެރިވާ ލުބުނާނުގެ ހިޒްބުﷲ ޖަމާޢަތަށް ހަތިޔާރު ފޯރުކޮށްދިނުމަށް ހުރަސްއެޅުމުގެ ގޮތުން ވައިގެ ޙަމަލާތަކެއް ދިނުމެވެ. އަދި އިސްރާއީލާ އިންވެގެން އޮންނަ ސޫރިޔާގެ ހުޅަނގު ދެކުނުގެ ސަރަޙައްދުތަކުގައި ހަނގުރާމަވެރި ޖަމާޢަތްތަކުން މަރުކަޒުވިޔަ ނުދިނުމެވެ.
ރަޝިޔާއާއި އީރާނުގެ އެހީތެރިކަމާއެކު ބައްޝާރުގެ ފައުޖުތައް ހަނގުރާމައިގައި ހޯދަމުންދާ ކާމިޔާބީގެ ސަބަބުން ހަނގުރާމައަށް ނިމުމެއް އަންނަން ކަރިއިވެފައިވާކަމުގެ ނިޝާންތަކެއް ދަނީ ފެންނަމުންނެވެ. އެއާއެކު އިސްރާއީލުންވަނީ ސޫރިޔާގެ އަސްކަރީ ވަޞީލަތްތައް ބޭނުންކުރުމަށް އީރާނުން ކުރާ މަސައްކަތްތައް ހުއްޓުވުމަށް މަސައްކަތްކުރަމުންނެވެ.
ސަރަޙައްދީ ބާރުވެރިކަން ހޯދުމަށް އީރާނުން ކުރަމުންދާ މަސައްކަތް ހުއްޓުވުމަށް އިސްރާއީލުން ގިނަ މަސައްކަތްތަކެއް ކުރެއެވެ. އިސްރާއީލުން ބުނީ 2020ވަނަ އަހަރުގެ ތެރޭގައި އެކަނިވެސް ސޫރިޔާގައި ހުންނަ އީރާނުގެ ވަޞީލަތްތަކާ ދެކޮޅަށް 500އަށްވުރެ ގިނަ މިސައިލު ޙަމަލާ ދީފައިވާނެކަމަށެވެ. ސޫރިޔާއަކީ އިސްރާއީލާ ކައިރީގައި އޮންނަ އީރާނުގެ އަސްކަރީ މަރުކަޒަކަށްވުމަށް އެ ޤައުމުން ނޭދޭކަމަށް އިސްރާއީލުން ބުނެއެވެ. އިސްރާއީލުން ދެކޭ ގޮތުގައި އީރާނަކީ އެ ޤައުމަށް އޮތް ނުރައްކަލެކެވެ. އީރާނުގެ ނިޔުކްލިޔަރ މަޝްރޫޢާ ދެކޮޅަށް އިސްރާއީލުން ޙަމަލާ ދީފައިވާކަމަށްވެސް އީރާނުން ތުހުމަތުކުރެއެވެ.