އިންގްލިޝް ޕްރިމިއަރ ލީގުގައި ޕޮއިންޓް ތާވަލްގެ އެއްވަނައިގައި އުޅޭ މެންޗެސްޓަރ ސިޓީ އާއި އެސްޓަންވިލާ ބައްދަލުކުރިމެޗް ސިޓީއިން ކާމިޔާބުކޮށް ލީގު ކާމިޔާބު ކުރުމާއި ގާތަށް ޖެހިލައިފިއެވެ. އެސްޓަންވިލާގެ ދަނޑުގައި ކުޅުނު މިމެޗް ސިޓީ ކާމިޔާބުކުރީ ފަހަތުން އަރާ 2 ލަނޑު އެއްލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ސިޓީއިން ގިނައިރު ބޯޅަ ގެންގުޅެ ގިނަ ހަމަލާ އުފެއްދި ނަމަވެސް ވިލާއިން މިމެޗް ފެށި ވަރަށް ރަނގަޅަށެވެ. މިގޮތުން މެޗްގެ ފުރަތަމަ މިނެޓްގައި ވިލާއިންވަނީ ލަނޑެއް ޖަހާ މިމެޗްގެ ވަރަށް ކުރީކޮޅު ލީޑެއް ނަގާފައެވެ. މިލަނޑު އެޓީމަށް ޖަހާދިނީ ޖޯން މެކްގިންއެވެ. ވިލާއިން މިލަނޑު ކާމިޔާބުކުރި ނަމަވެސް ސިޓީއިން ހިތްވަރު އެލުވާނުލާ ލަނޑެއް ޖެހޭތޯ ކުރަމުންދިޔަ މަސައްކަތުގެ ނަތިޖާއަކަށްވީ މެޗްގެ 22 ވަނަ މިނެޓްގައި ފިލް ފޮޑެން ޖަހާދިން ލަނޑުން މެޗްގެ ނަތީޖާ ހަމަހަކުރުމެވެ. އަދި މެޗްގެ 40 ވަނަ މިނެޓްގައި ރޮޑްރީ ޖަހާދިން ލަނޑުން މިމެޗްގައި ސިޓީއިން ލީޑު ނެގިއެވެ. ނަމަވެސް މިލަނޑު ޖެހިތާ 4 މިނެޓްފަހުން ވިލާއިން އެއް އަރިމަތިން އުފެއްދި ހަމަލާއެއް ދިފާއު ކުރަން އުޅުމުގެ ތެރޭގައި ބޯޅައިގާ ޖަހަން ޖޯން ސްޓޯންސް ހުރާލި ފައި ވިލާގެ ޖޭކޮބް ރަމްސީގެ ފަޔަށް އެރުމުގެ ސަބަބުން ވީއޭއާރުގެ ލަފާގެ މަތިން ރެފްރީ ބެލުމަށްފަހު ޖޯން ސްޓޯންސް އަށް ވަނީ ސީދާ ރަތްކާޑު ދައްކާފައެވެ. މިކާޑުގެ ސަބަބުން މިއަންނަ ހަފްތާ ބަންދުގައި ޓޮޓްނަމް ހޮޓްސްޕަރ އާއި ދެކޮޅަށް ސިޓީއިން ކުޅުމަށް ހަމަޖެހިފައިވާ ކަރަބާއޮ ކަޕްގެ ފައިނަލްގައި ސްޓޯންސްއަކަށް ނުކުޅެވޭނެއެވެ. ސިޓީގެއެއް ކުޅުންތެރިއެއް މަދުވުމުން ދެވަނަ ހާފްގައި ސިޓީއަށް ގިނަ އުނދަގޫ ތަކަކާއި ވިލާގެ ފަރާތުން ކުރިމަތިވާނެ ކަމަށް ހީވި ނަމަވެސް ދެވަނަ ހާފްގެ ކުރީކޮޅު ވަރަށް ގާތް ގާތުގައި ވިލާގެ މެޓީ ކޭޝް ކުރި ދެ ފައުލަކާއި ގުޅިގެން ދެވަނަ ރީނޑޫ ކާޑާއެކު ރަތްކާދު ދެއްކުމުން މިމެޗްގެ ބާކީ އޮތްބައިގައި ދެޓީމުންވެސް ކުޅުނީ 10 ކުޅުންތެރިންނާއެކުއެވެ. މިމެޗްގެ ދެވަނަ ހާފްގައިވެސް ސިޓީއިން ލަނޑު ޖަހާނެ ރަނގަޅު ހަމަލާތަކެއް އުފެއްދި ނަމަވެސް މިއީން އެއްވެސް ހަމަލާއެއް ކާމިޔާބު ކުރެވޭގޮތެއް ނުވިއެވެ.
މިކާމިޔާބީއާއެކު ސިޓީ އަށް މިހާރުވަނީ 33 މެޗުން 77 ޕޮއިންޓް ލިބިފައެވެ. އަދި އެންމެ ގާތުން ވާދަކުރާ މެންޗެސްޓަރ ޔުނައިޓެޑަށް 32 މެޗުން 66 ޕޮއިންޓް ލިބިފާވާތީ ސިޓީއަށް މިފަހަރު ލީގު ކާމިޔާބުރުމަށްޓަކައި މިހާރު ބޭނުންވަނީ ބާކީ އޮތް 5 މެޗުން 8 ޕޮއިންޓް ހޯދާށެވެ. މިމެޗުން ބަލިވުމުން ވިލާ މިހާރު އުޅެނީ ކުޅުނު 31 މެޗުން ލިބިފައިވާ 44 ޕޮއިންޓާއެކު ތާވަލްގެ 11 ވަނައިގައެވެ.