އެމްއެމްއޭއިން ސަރުކާރަށް ދަރަނި ނެގޭގޮތަށް މިދިޔަ އަހަރު މަޖިލީހުން ދީފައިވާ ހުއްދައިގެ މުއްދަތު އިތުރުކޮށްދިނުމަށް ފިނޭންސް މިނިސްޓްރީން އެދިފައިވާ މައްސަލަ ދިރާސާކުރުމަށް ހާއްސަ ކޮމިޓީއަކަށް ފޮނުވައިފިއެވެ.
މިމަހުގެ 26ގެ ކުރިން މި މައްސަލައަށް ގޮތެއް ނިންމަވައިދެއްވުމަށް ފިނޭންސް މިނިސްޓްރީން އެދިވަޑައިގެންފައިވަނިކޮށް، އިއްޔެގެ ޖަލްސާގައި މި މައްސަލަ ފާސްކުރުމަށް ނުފެންނަކަމަށް މެންބަރުން ވޯޓު ދެއްވިއެވެ. ނަމަވެސް މިއީ މިވަގުތު ޤައުމު ހިންގުމަށާއި އިޤްތިޞާދަށް މުހިންމު މައްސަލައެއްކަމަށް ވިދާޅުވެ މަޖިލީހުގެ ރައީސް ވަނީ އަލުން އެ މައްސަލަ މިއަދުގެ ޖަލްސާއަށް އެޖެންޑާކުރައްވާފައެވެ.
މިއަދުގެ ޖަލްސާގައި އަލިފުށީ ދާއިރާގެ މެންބަރު މުޙައްމަދު ރަޝީދު ޙުސައިން ވަނީ އެ މައްސަލަ ދިރާސާކުރެއްވުމަށް 9 މެންބަރުންގެ ޚާއްޞަ ކޮމިޓީއަކަށް ފޮނުވުމަށް ހުށައަޅުއްވާފައެވެ. އަދި އެ ހުށައެޅުން ފާސްވީ 51 މެންބަރުންގެ ވޯޓުންނެވެ.
މި މައްސަލަ ދިރާސާކުރުމަށް ފޮނުއްވި 9 މެންބަރުންގެ ޚާއްޞަ ކޮމިޓީގައި ހިމެނިވަޑައިގަންނަވަނީ:
1- ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް
2- ހުޅުދޫ ދާއިރާގެ މެންބަރު އިލްޔާސް ލަބީބް
3- ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ
4- ހެންވޭރު ދެކުނު ދާއިރާގެ މެންބަރު ޙުސައިން ޝަހީމް
5- ތުލުސްދޫ ދާއިރާގެ މެންބަރު އިބްރާހީމް ނަސީމް
6- މީދޫ ދާއިރާގެ މެންބަރު މުޙައްމަދު ސިޔާމް އަޙްމަދު
7- މާމިގިލީ ދާއިރާގެ މެންބަރު ޤާސިމް އިބްރާހީމް
8- މާވަށު ދާއިރާގެ މެންބަރު މުޙައްމަދު ސަޢީދު
9- އަލުފުށީ ދާއިރާގެ މެންބަރު މުޙައްމަދު ރަޝީދު ޙުސައިން
މަޖިލީހުގެ ރައީސް ވަނީ މި މައްސަލަ ދިރާސާކުރުމުގެ މަސައްކަތް މިއަދާއި މިރޭ ކުރިއަށް ގެންދަވާ، މާދަމާގެ ޖަލްސާއަށް ފާސްކުރެއްވޭ މިންވަރަށް މަސައްކަތް ނިންމަވާދެއްވުމަށް އެދިވަޑައިގެންފައެވެ. އަދި ހުރިހާ ސިޔާސީ ޕާޓީއެއް އެއްބަސްވާނަމަ އެ މައްސަލަ ފާސްކުރުމަށް މާދަމާ ޖަލްސާއެއް ބާއްވާނެކަމަށާއި، އެއްބަސްވުމަކަށް ނާދެވިއްޖެނަމަ އާދީއްތަ ދުވަހު ޖަލްސާއެއް ބާއްވާނެކަމަށް ރައީސް ނަޝީދު ވިދާޅުވިއެވެ. ނަމަވެސް މިއީ ވީހާވެސް އަވަހަށް ފާސްކުރަންޖެހޭ މައްސަލައެއްކަން ފާހަގަކުރައްވާ ރައީސް ނަޝީދު ވަނީ ހުރިހާ ޕާޓީތަކުން އެއްބަސްވާނެކަމަށް އުއްމީދު ކުރައްވާކަމަށްވެސް ވިދާޅުވެފައެވެ.
ކޯވިޑް-19ގެ ބަލިމަޑުކަމުގެ ސަބަބުން ރާއްޖޭގެ އިޤްތިޞާދަށް އައި ހީނަރުކަމުން އައިގަތުމަށް ދައުލަތުގެ ކޭޝްފްލޯ މެނޭޖް ކުރުމަށްޓަކައި، މަރުކަޒީ ބޭންކު (އެމްއެމްއޭ)އިން ސަރުކާރަށް ދަރަނި ނެގޭގޮތަށް މިދިޔަ އަހަރު މަޖިލީހުން ދީފައިވާ ހުއްދަ އިތުރުކޮށްދިނުމަށް ފިނޭންސް މިނިސްޓްރީން މަޖިލީހަށް ފޮނުއްވާފައިވާ ސިޓީގައި ވަނީ، ރައްޔިތުންގެ މަޖިލީހުން ދީފައިވާ އިސްތިސްނާއަށް 1 އަހަރުވާން ކައިރިވެފައިވާއިރު، މި އިޤްތިސާދީ ފުން ވަޅުގަނޑުން އެއްކޮށް އަރައިގަނެވިފައި ނުވާކަމަށެވެ. އަދި ކޯވިޑް ބަލިމަޑުކަމާއި ގުޅިގެން ކުރިމަތިވެފައިވާ އިޤްތިސާދީ ތަދުމަޑުކަމުގެ ސަބަބުން ރާއްޖޭގެ އިޤްތިސާދީ އަދި މާލީ ހާލަތަށް ބޮޑެތި ގޮންޖެހުންތަކެއް ކުރިމަތިވެފައިވާކަމަށާއި، މިގޮތުން 2020 ވަނަ އަހަރުގެ 4 ކުއާޓަރުގައި ވެސް ރާއްޖޭގެ އިޤްތިސާދީ ކުރިއެރުން ވަނީ އޭގެ ކުރީ އަހަރުގެ އެ ކުއާޓަރުތަކާ އަޅާބަލާއިރު ދަށްވެފައިކަމަށް ފިނޭޏްސްގެ ސިޓީގައިވެއެވެ.
އަދި ވޭތުވެދިޔަ 4 ކުއާޓަރުގައި ރާއްޖޭގެ އުފެއްދުންތެރިކަން ދަށްވެފައިވުމާއި އަންއެމްޕްލޯއިމަންޓް ރޭޓް މަތީގައި ހުރުމާއި ބޭރު ފައިސާގެ އާމްދަނީ ދަށްވެފައިވުމާއެކު ރާއްޖޭގެ ބެލެންސް އޮފް ޕޭމަންޓްސްއަށް ލޮޅުން އައިސްފައިވުމާއެކު، އެ އިޤްތިސާދީ ބޮޑު ހީނަރުކަމެއް ދިމާވެފައިވާކަމަށްވެސް ފިނޭންސްގެ ސިޓީގައިވެއެވެ. އެހެންކަމުން އެމްއެމްއޭއިން ދަރަނި ނެގުމަށް، ޚަރަދަށް ޒިންމާވުމުގެ ޤާނޫނުން މިދިޔަ އަހަރު އިސްތިސްނާކޮށްދެއްވި މާއްދާތައް އެއް އަހަރަށް އިތުރުކޮށްދެއްވުމަށް ފިނޭންސް އިން ވަނީ އެދިވަޑައިގެންފައެވެ.