ދިވެހި ސިފައިންގެ ފަޚުރުވެރި ޚިދުމަތުގެ ކޮންމެ ދުވަހެއް ފެށި ނިމެނީ، ޤައުމުގެ ޙައްޤުގައި ކުރާން އޮތް މަސައްކަތުގައި ދެމިތިބެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިހެން ވިދާޅުވީ ދިވެހި ސިފައިންގެ 129 ވަނަ އަހަރީ ދުވަހުގެ ތަހުނިޔާ ދިވެހި ސިފައިންނަށް އަރިސްކުރައްވައ، ފޮނުއްވި މެސެޖުގައެވެ.
ދިވެހި ސިފައިންގެ އަހަރީ ދުވަހުގެ މުނާޞަބަތުގައި ރައީސް ކުރެއްވި ޓްވީޓެއްގައި ވިދާޅުވީ، ދިވެހި ސިފައިންގެ ފަޚުރުވެރި ޚިދުމަތުގެ ކޮންމެ ދުވަހެއް ފެށި ނިމެނީ ޤައުމުގެ ޙައްޤުގައި ކުރާން އޮތް މަސައްކަތުގައި ދެމިތިބެކަމަށެވެ. އަދި ސިފައިންގެ 129 ވަނަ އަހަރީ ދުވަހުގެ ހެޔޮއެދުމާއި ތަހުނިޔާ މިނިސްޓަރ އޮފް ޑިފެންސަށާއި ޗީފް އޮފް ޑިފެންސް ފޯސް އަދި ހުރިހާ ސިފައިންނަށް ދަންނަވާކަމަށް ރައީސް ވިދާޅުވިއެވެ.
ދިވެހި ސިފައިން އުފެދިފައިވަނީ މީލާދީން 1892 އަހަރުގެ އޭޕްރީލް މަހުގެ 21 ވަނަ ދުވަހުއެވެ.
ދިވެހި ސިފައިންނަކީ ޚިދުމަތުގެ އަގުހުރި ތާރީޚެއް އޮތް ބައެކެވެ. ދިވެހި ސިފައިންގެ ތާރީޚުން އެންމެ ފާހަގަކުރެވޭ ޚިދުމަތަކީ، 1988 ވަނަ އަހަރުގެ ނޮވެމްބަރ މަހުގެ 3 ވަނަ ދުވަހު ބޭރުގެ ޢައިރު ޤާނޫނީ ހަނގުރާމަވެރި ޖަމާޢަތެއްގެ އެތައް ހަނގުރާމަވެރިންނާއި ހަތިޔާރާއެކު ދިވެހި މަދު ޚާއިނުންގެ ބަޔަކު ވެރިޔަށް މާލެއަށް އަރައި، ދިން ޙަމަލާތަކާ ގުޅިގެން އެ ހަނގުރާމަވެރިންނާ ދެކޮޅަށް ކުރި ހަނގުރާމައެވެ. މި ޙާދިސާގައި ދިވެހި ސިފައިން ވަނީ އިސްލާމްދީނާއި ދިވެހި ޤައުމުގެ ދިފާޢުގައި ސާބިތުކަމާއެކު ހަނގުރާމަކޮށް، ދިވެހި ރައްޔިތުންނާއި ދިވެހި ދައުލަތާއި ޤައުމާއި ޤާނޫނީ ވެރިކަން ސަލާމަތްކުރުމުގައި ކާމިޔާބީ ހޯއްދަވާފައެވެ. އެ ޙަމަލާތަކުގައި ދިވެހި ސިފައިން ބަޔަކާއި ދިވެހި ޢާންމުގެ ބަޔަކު ޝަހީދުވެފައިވެއެވެ. އަދި ބޭރުން އެރި އެތައް ހަނގުރާމަވެރިންނެއް މަރާލާފައިވެއެވެ.
ދިވެހި ސިފައިންގެ ޚިދުމަތަކީ ގިނަ ޒަމާންތަކެއް ވަންދެން މާލޭގައި ޤާއިމްވެ ތިބި ބަޔެއްނަމަވެސް، ފަހުން ވަނީ ރާއްޖޭގެ އެކި ސަރަޙައްދުތަކުގައި ސިފައިންގެ މަރުކަޒުތައް ޤާއިމްކުރައްވައި އެތަންތާނގައި ޚިދުމަތް ދެއްވަން ފަށްޓަވާފައެވެ. އަދި ސިފައިންގެ މައްޗަށް އޮތް ޤައުމީ ވާޖިބު އަދާކުރެއްވުމަށް ބޭނުންވާ ލޮޖިސްޓިކް ޤާބިލްކަމާއި ސިފައިންގެ ތަމްރީނާއި ހުނަރުގެ ޤާބިލްކަން އިތުރުކުރެއްވުމުގައި ވަނީ ކުރިއެރުންތައް ހޯއްދަވާފައެވެ. ޚާއްޞަކޮށް ދުނިޔޭގެ އެންމެ މަތީފެންވަރުގެ ޢަސްކަރީ ތަމްރީން ލިބިފައިވާ ސިފައިން ދިވެހި ސިފައިންގެ ތެރޭގައި ހިމެނޭކަން ފާހަގަކުރެވެއެވެ.
ދިވެހި ސިފައިންގެ އަހަރީ ދުވަސް ކޮންމެ އަހަރަކުވެސް އަންނަނީ ފާހަގަކުރަމުންނެވެ. މިކަމަށްޓަކައި ކުރެވޭ މަސައްކަތްތައް ޢާންމުކޮށް ބިނާކުރައްވަނީ ސިފައިންގެ ޚިދުމަތާމެދު ރައްޔިތުންނަށް އޮންނަ އިތުބާރު ވަރުގަދަކުރައްވައި ސިފައިންގެ ތަޞައްވުރު ރަނގަޅު ކުރައްވައި، ސަފުތައް ބަދަހިކުރައްވައި އަދި ޤައުމީ ރޫޙު ވަރުގަދަ ކުރެއްވުމުގެ މައްޗަށެވެ.
ދިވެހި ސިފައިންގެ 129 ވަނަ އަހަރީ ދުވަސް މިއަދު ފާހަގަކުރާއިރު، ސަރުކާރުން ވަނީ ފާއިތުވި 2 އަހަރު ދުވަހުގެ ތެރޭގައި ދިވެހި އަސްކަރިއްޔާއަށް ބޮޑެތި ކުރިއެރުންތަކެއް ގެނުވާފައެވެ. އެގޮތުން ބޭރުގެ ޤައުމުތަކާއިއެކު އޮންނަ ގުޅުމުގެ ތެރެއިން ދިވެހި ސިފައިންނަށް ތަޢުލީމާއި ތަމްރީންގެ ގިނަ ފުރުޞަތުތަކެއް ފަހިކޮށްދިނުން ހިމެނެއެވެ. ޚައްޞަކޮށް އަސްކަރިއްޔާގައި އަންހެނުންގެ ދައުރު ވަނީ ފުޅާކުރައްވާފައެވެ. އެގޮތުން ރާއްޖޭގެ ތާރީޚުގައި ފުރަތަމަ ފަހަރަށް ދިފާޢީ ވަޒީރުކަށް އަންހެން ބޭފުޅަކު އައްޔަންކުރެއްވުން ހިމެނެއެވެ. އަދި ސިފައިންގެ ލަފާދޭ މަޖިލީހަށް އަންހެން ދެ އޮފިސަރަކު އައްޔަންކުރުމާއި، ދިވެހި ސިފައިންގެ ތާރީޚުގައި ފުރަތަމަ ފަހަރަށް ލެފްޓެނެންޓް ކާނަލްގެ މަޤާމަށް 3 އަންހެން ސިފައިން ވަނީ ރޭންކުކުރުންވެސް ހިމެނެއެވެ.