ރާއްޖެއާއި އިނގިރޭސިވިލާތުގައިހުރި ވިޔަފާރިއާއި އިންވެސްޓްމަންޓްގެ ފުރުޞަތުތައް ދެނެގަތުމުގެ މަސައްކަތް ކުރައްވަމުން އަންނަކަމަށް އިނގިރޭސިވިލާތުގެ އިންޓަރނޭޝަނަލް ޓްރޭޑް މިނިސްޓަރ އަދި ޤާނޫނު ހަދާ މަޖިލީހުގެ މެންބަރު ރަނިލް ޖަޔަވަރްދެނަ ވިދާޅުވެއްޖެއެވެ.
އިނގިރޭސިވިލާތުގެ ޤާނޫނު ހަދާ މަޖިލީހުގައި ރާއްޖެއާއި އިނގިރޭސިވިލާތާ ދެމެދު އޮތް ގުޅުމާ ގުޅޭގޮތުން ދެންނެވި ސުވާލަކަށް ޖަވާބުދެއްވަމުން ރަނިލް ވިދާޅުވީ، ދިވެހިރާއްޖެއަކީ އިނގިރޭސިވިލާތުގެ ވަރަށްގާތް ބައިވެރިއެއްކަމަށެވެ. ދެޤައުމުގެ ދެމެދުގައި ހުރި ވިޔަފާރިއާއި އިންވެސްޓްމަންޓްގެ ފުރުޞަތުތައް ދެނެގަތުމުގެ މަސައްކަތް ކުރައްވަމުން އަންނަކަމަށާ، އޭގެތެރޭގައި ކާބޯ ތަކެއްޗާއި ދިފާޢީ ދާއިރާއާއި ތަޢުލީމާއި ސިއްޙީދާއިރާއާއި ފިޓްނެސްގެ ދާއިރާއާއި ތިމާވެއްޓާއި ސައިންސް އަދި ދެމެހެއްޓެނިވި ތަރައްޤީގެ ދާއިރާ ހިމެނޭކަމަށް ރަނިލް ވިދާޅުވެފައިވެއެވެ.
ޚާއްޞަކޮށް މާލީ ދާއިރާއިންނާއި ތަރައްޤީގެ މަޝްރޫޢުތަކާއި އިޢާދަކުރަނިވި ހަކަތަ ބޭނުންކުރުމުގެ ދާއިރާއިން އިންވެސްޓްކުރުމަށްހުރި ފުރުޞަތުތައް ބަލަމުން އަންނަކަމަށްވެސް އިންގިރޭސިވިލާތުގެ ޤާނޫނު ހަދާ މަޖިލީހުގެ މެންބަރު އަދި އިންޓަރނޭޝަލް ޓްރޭޑް މިނިސްޓަރ ވިދާޅުވިއެވެ.
ރަނިލް ޖަޔަވަރްދެނަ އަކީ އެޤައުމުގެ ނޯތް އީސްޓް ހަމްޕްޝާ ތަމްސީލް ކުރައްވާ މެންބަރެވެ. އަދި މެއި 2020ވަނަ އަހަރުން ފެށިގެން އެޤައުމުގެ އިންޓަރނޭޝަން ޓްރޭޑް މިނިސްޓަރުވެސްމެއެވެ.
ރާއްޖެއާއި އިނގިރޭސިވިލާތަކީ ޒަމާނުއްސުރެ ގާތް ގުޅުމެއް އޮންނަ ދެޤައުމެވެ. ޚައްޞަކޮށް ވިޔަފާރީގެ ދާއިރާއިން ދެ ޤައުމުގެ ގުޅުން ފާހަގަކޮށްލެވެއެވެ. އެގޮތުން އިނގިރޭސިވިލާތަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ އެއް ޤައުމެވެ. ރާއްޖެއިން އަންނަނީ އިނގިރޭސިވިލާތް ހިމެނޭހެން ޔޫރަޕަށް އެކްސްޕޯޓްކުރާ މަހުގެ ބާވަތްތަކުން ނަގާ ޑިއުޓީ ކަނޑާލުމަށް ގިނަ މަސައްކަތްތަކެއް ކުރަމުންނެވެ. އަދި މިހާތަނަށް ޑިއުޓީ ކުޑަކޮށްދީފައިވާއިރު، މަހުގެ ބާވަތްތަކުން ނަގާ ޑިއުޓީއާ ގުޅޭގޮތުން ރާއްޖެއަށް ފައިދާހުރި ގޮތްތަކެއް ނިންމައިދޭނެކަމަށް އެޤައުމުން ކުރިން ހާމަކޮށްފައިވެއެވެ.