އިނގިރޭސިވިލާތުގެ ރާނީ އެލިޒަބެތުގެ ފިރިކަލުން ޑޫކް އޮފް އެޑިންބަރގް ޕްރިންސް ފިލިޕް އަވަހާރަވުމާ ގުޅިގެން ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އިނގިރޭސި ރާނީ އެލިޒަބަތަށް ތަޢުޒިއާފޮނުއްވައިފިއެވެ.
ރައީސުލްޖުމްހޫރިއްޔާ ކުރެއްވި ޓުވީޓެއްގައި ވިދާޅުވެފައިވަނީ އިނގިރޭސިވިލާތަށް ކުރިމަތިވި މިހިތާމަވެރި ދަނޑިވަޅުގައި ރާނީ އެލިޒަބަތާއި ޝާހީ ޢާއިލާއާއި އިނގިރޭސި ރައްޔިތުންނަށް އެމަނިކުފާނުގެ އިޚްލާސްތެރި ތަޢުޒިއާއާއި ޙަމްދަރުދީ ފޮނުއްވާކަމަށެވެ.
ރައިސް ވިދާޅުވީ ޕްރިންސް ފްލިޕަކީ ޤައުމީ ޚިދުމަތުގައި ލާމަސީލު ބޭފުޅެއްކަމަށެވެ.ޢާއްމު ޚިދުމަތުގައި ނަމޫނާ ބޭފުޅެއްގެ ގޮތުގައިވަނީ ފާހަގަކުރައްވާފައެވެ. އަދި ރާނީ އާއެކު ޕްރިންސް ފްލިޕް 1972ވަނަ އަހަރު ރާއްޖެއަށް ކުރެއްވި ދަތުރުފުޅަކީ ދިވެހިން މިއަދުވެސް ލޯތްބާއެކު ހަނދާންކުރާ ދަތުރުފުޅެއްގެ ގޮތުގައި ރައިސް ޞާލިޙު ސިފަކުރެއްވިއެވެ.
އިނގިރޭސިވިލާތުގެ ރާނީ އެލިޒަބެތުގެ ފިރިކަލުން އަދި ޑޫކް އޮފް އެޑިންބަރގު ޕްރިންސް ފިލިޕް އަވަހާރަވެފައިވަނީ ހުކުރުދުވަހުގެ ހެނދުނުގެ ވަގުތެއްގައިކަމަށެވެ. ޕްރިންސް ފްލިޕް އަވަހާރަވެފައިވަނީ އާލާސްކަންފުޅާ އުޅުއްވާތާ ގިނަ ދުވަސްތަކެއްވުމަށްފަހުގައެވެ. ޕްރިންސް ފިލިޕާއި ރާނީ އެލިޒަބަތު ކައިވެނިފުޅު ބައްލަވައިގަތީ 1947ވަނަ އަހަރުގެ ތެރޭގައެވެ. އެ ދެމަފިރިކަންބަލުންގެ ހަތަރު ބޭފުޅުން ތިއްބަވައެވެ.