އެމެރިކާގެ ޤާނޫނުހަދާ މަޖިލީސް ހިންގާ ކެޕިޓޮލް އިމާރާތުގައި ހިންގި ހާދިޘާއެއްގައި ދެ މީހުން މަރުވެއްޖެއެވެ.
މާރޗު މަހުގެ 2ވަނަ ދުވަހު ހިންގި ހާދިޘާގައި ބާރު ދުވެއްޔެއްގައި ދުއްވާފައި އައި ކާރެއްވަނީ ކެޕިޓޮލް އިމާރާތުގެ ސަލާމަތީ ކަންކަން ބަލަހައްޓާ ފުލުހުންގެ ގައިގައި ޖައްސައިފައެވެ. އެ ކާރު ދުއްވަން އިން މީހާވަނީ ފުލުހުންނަށް ވަޅިން ބިރުދައްކައި ހަމަލާ ދީފައެވެ. ފުލުހުންވަނީ އެ މީހާގެ ގަޔަށް ބަޑި ޖަހައި މަރައިލާފައެވެ.
ކެޕިޓޮލްގެ ފުލުހުން ބުނީ އެ ހާދިޘާގައި އަނިޔާވި ފުލުހުންގެ އޮފިސަރަކު މަރުވެފައިވާ ކަމަށެވެ. މަރުވި އޮފިސަރަކީ 18 އަހަރު ވަންދެން ފުލުހުންގެ ޚިދުމަތުގައި މަސައްކަތް ކޮށްފައިވާ ފުލުހެކެވެ. އެ ޙަމަލާގައި އިތުރު ފުލުހަކުވެސްވަނީ ޒަޚަމްވެފައެވެ. ނަމަވެސް އޭނާގެ ޙާލު ރަނގަޅެވެ.
ފުލުހުން ބުނީ ކެޕިޓޮލް އިމާރާތަށް ދިން ޙަމަލާއަކީ ނިރުބަވެރިކަމާ ގުޅުމެއްހުރި ޙަމަލާއެއްކަމަށް ނުބެލެވޭކަމަށެވެ. ނަމަވެސް އިތުރަށް ތަޙްޤީޤު ކުރަންޖެހޭ ކަންކަން ބަލަމުން ދާނެކަމަށް ފުލުހުން ބުންޏެވެ.
އެނގިފައިވާ ގޮތުގައި އެ ޙަމަލާ ދިނީ އެމެރިކާގެ ވަރޖީނިއާ ސްޓޭޓަށް ނިސްބަތްވާ އުމުރުން 25 އަހަރުގެ ނޯއާ ގްރީންއެވެ. އޭނާއަކީ ނަފްސާނީ މައްސަލަތަކެއް ހުންނަ މީހެއްކަމަށް އޭނާގެ ޢާއިލާއިން ބުނެއެވެ. ކެޕިޓޮލްގައި ހިންގި ހާދިޘާއާ ގުޅިގެން އެމެރިކާގެ ރިޔާސީ ގަނޑުވަރު، ވައިޓް ހައުސްގައި ހުރި ދިދަތައްވަނީ ބައި ދަނޑިއަށް ތިރިކޮށްފައެވެ.