ރަޝިޔާއާއި ޖަރުމަނުވިލާތާ ދެމެދު ކަނޑުގެ އަޑިން އަޅާ ގުދުރަތީ ގޭސް ހޮޅިތަކަށް ނުރައްކާކުރިމަތިވެދާނެކަމަށް އެ މަޝްރޫޢު ހިންގާ ނޯޑު ސްޓްރީމް 2 އޭޖީން ބުނެފިއެވެ.
ނޯޑު ސްޓްރީމް 1 އޭޖީގެ އިސް ބޭފުޅެއްކަމަށްވާ އަންދުރޭ މިނިން ވިދާޅުވީ އެ މަޝްރޫޢުގެ މަސައްކަތަސް ބޭނުންކުރަމުން އަންނަ އުޅަނދުތަކަސް ނުރައްކަލާ ކުރިމަތިލާން ޖެހިފައިވާކަމަށެވެ. މިގޮތުން މި މަސައްކަތުގައި ބޭނުންކުރާ ބޯޓްތައް ބައެއް ޤައުމުތަކުގެ އަސްކަރީ އުޅަނދުތަކުގެ އަމާޒަކަށްވެފައިވާކަމަށް އެނާ ތުހުމަތުކުރެއްވިއެވެ.
މިނިން ވިދާޅުވީ މިދިޔަ މަހުގެ 28ވަނަ ދުވަހުވެސް މި ފަދަ ހާދިސާއެއް ދިމާވެފައިވާކަމަށެވެ. މިގޮތުން މި މަޝްރޫޢަށް ބޭނުންވާ ހޮޅި އެޅުމަށް ބޭނުންކުރާ އުޅަނދާއި ދާދި ގާތުން ގޮތް ނޭނގޭ ސަބްމެރީނެއް ފެނިފައިވާކަމަށް މިނިން ވިދާޅުވިއެވެ.
މީގެއިތުރުން ވަރަށް ތިރިން އުދުހޭ ގިނަ އަދަދެއްގެ މަތިންދާ ބޯޓުތައްވެސް މިދިޔަ މަހުގެ މެދުތެރޭ އެ ސަރަޙައްދުން ފެނިފައިވާކަމަށް އޭނާ ވިދާޅުވިއެވެ. އެވާހަކަތައް ކަށަވަރު ކޮށްދެމުން ނޯޑުސްޓްރީމް 2 އޭޖީން ބުނީ އެ ހާދިޘާތަކުގެ ސަބަބުން ކަނޑުމަތީގެ ސަލާމަތާބެހޭ ޤަވާއިދުތަކަށް ޢަމަލުކުރުމުގެ މުހިންމުކަން ހާމަވެފައި ވާކަމަށެވެ.
ނޯޑު ސްޓްރީމު 2 މަޝްރޫއާއި މެދު އެމެރިކާއިން ވަރަށް ބޮޑަށް ހިތްހަމަ ނުޖެހެއެވެ. އެ މަޝްރޫޢުގެ 95 އިންސައްތަ ނިމިފައިވާކަމަށް ނޯޑު ސްޓްރީމް 2 އޭޖީން ބުނެއެވެ. އެ މަޝްރޫޢުގެ ދަށުން ހޮޅި އަޅަން ބާކީ އޮތީ 121 ކިލޯމީޓަރުގައިކަމަށް އެ ކޮންސޯޓިއަމުން ބުނެއެވެ.