މައްކާއާއި މަދީނާއާ ދެމެދު އަލުން ރޭލު ދަތުރުތައް ފަށައިފި

އަހަރަކަށްވުރެ ގިނަ ދުވަހަށް މެދުކަނޑާލައިފައި އޮތުމަށްފަހު ސަޢުދީ ޢަރަބިއްޔާގެ މައްކާއާއި މަދީނާއާ ދެމެދު އަލުން ރޭލު ދަތުރުތައް ފަށައިފިއެވެ.

ކޯވިޑް-19އާ ގުޅިގެން މައްކާއާއި މަދީނާއާ ދެމެދު ކުރާ ރޭލު ދަތުރުތައް މެދުކަނޑައިލީ މިދިޔަ އަހަރުގެ މާރިޗު މަހުގެ ތެރޭގައެވެ. އެޭގެ އެއް އަހަރުފަހުން އަލުން ދަތުރުތައް ފަށައިފައިވަނީ ރަމަޟާން މަސް ފެށުމަށް ގާތްވެފައިވަނިކޮށެވެ.

ރޭލު ނިޒާމުގެ ތެރެއިން މައްކާއާއި މަދީނާއާއި ޖިއްދާގައި ހުންނަ ކިންގު އަބްދުލްއަޒީޒު އެއާޕޯޓާއި ރާބިޣުގައި ހުންނަ ކިންގު އަބްދުﷲ އިކޮނޮމިކް ސިޓީއާ ދެމެދު ދުވާލެއްގެ މައްޗަށް ގިނަވެގެން 54 ދަތުރުކުރާނެއެވެ. ކޮންމެ ރޭލެއްގައި 417 ފަސިންޖަރުން އެއްފަހަރާ ދަތުރުކުރެވޭނެއެވެ. ގަޑިއިރަކު 300 ކިލޯމީޓަރުގެ ބާރުމިނުގައި ދުވާ ރޭލުތަކުގެ ސަބަބުން 2.5 ގަޑިއިރުގެ ތެރޭގައި މައްކާއާއި މަދީނާއާ ދެމެދު ދަތުރުކުރެވޭނެއެވެ.