ދުނިޔޭގައި ކޯވިޑް-19 ފެތުރެން ދިމާވި ގޮތާއި ގުޅޭގޮތުން ދުނިޔޭގެ ޞިއްޙަތު ޖަމުޢިއްޔާ ޑަބުލިޔުއެޗުއޯއިން ކުރި ތަހުޤީޤަށް އެންމެ ފުރިހަމައަށް ޗައިނާއިން މަޢުލޫމާތު ނުދޭކަމަށް ބުނެ ކުރާ ތުހުމަތުތަކުގައި އެއްވެސް އަސާސެއް ނެތްކަމަށް ޗައިނާއިން ބުނެފިއެވެ.
ކޯވިޑް-19އާ ގުޅޭ މަޢޫލޫމާތު ޑަބުލިޔުއެޗުއޯއަށް ފޯރުކޮށްދިނުމަށް ޗައިނާގެ ފަރާތުން އެންމެ އިސްކޮށް ޙަރަކާތްތެރިވެވަޑައިގަތް އެ ޤައުމުގެ އިސް ޞިއްޚީ މާހިރެއްކަމަށްވާ ލިއަންގު ވަނިއަން ވިދާޅުވީ ތަހުޤީޤުގައި ޑަބުލިޔުއެޗުއޯގެ މާހިރުންނާއި ޗައިނާގެ މާހިރުން ބަލާފައިވަނީ އެއް މަޢުލޫމާތުތަކެއްކަމަށެވެ. އެހެންކަމުން ތަހުޤީޤީ ވަފުދަށް ފުރިހަމަ މަޢުލޫމާތު ފޯރުކޮށްނުދޭކަމަށް ނުބުނެވޭނެކަމަށް އޭނާ ވިދާޅުވިއެވެ. ޗައިނާގެ ޢަމަލުކުރަމުންދާ ބައެއް ޤާނޫނުތަކުގެ ދަށުން ބައެއް މަޢުލޫމާތުގެ ކޮޕީ ހައްދައި ފޮޓޯ ނެގުމުގެ ޙުއްދަ ނޯންނަކަމަށް އޭނާ ފާހަގަކުރެއްވިއެވެ. ނަމަވެސް އެ މަޢުލޫމާތުތައް ބެލުމުގެ ފުރުޞަތު ޑަބުލިޔުއެޗުއޯގެ ވަފުދަށް ލިބުނުކަމަށް އޭނާ ވިދާޅުވިއެވެ.
ޗައިނާގެ ފަރާތުން ތަހުޤީޤުތަކުގައި ބައިވެރިވި ލިއަންގު ވިދާޅުވާގޮތުގައި ތަހުޤީޤުގެ ހޯދުންތައް ހިމަނައިގެން ރިޕޯޓެއް ޝާޢިރުކުރުމުގައި ލަސްތަކެއްވިކަމަކަށް ޤަބޫލެއް ނުކުރެވޭނެއެވެ. އެ ރިޕޯޓުގައި ހިމަނާފައިވާ ހުރިހާ މަޢުލޫމާތުތަކަކީ ޞައްޙަ މަޢުލޫމާތުތަކެއްކަން ކަށަވަރުކޮށްފައި ނޫނީ ރިޕޯޓުގައި ހިމަނާފައި ނުވާނެކަމަށް އޭނާ ވިދާޅުވިއެވެ. އެ ރިޕޯޓު ތައްޔާރުކުރުމުގައި އިސްކަން ދީފައިވަނީ އެ ރިޕޯޓުގެ ފެންވަރު ރަނގަޅު ކުރުމަށްކަމަށް އޭނާ ފާހަގަ ކުރެއްވިއެވެ.
ޑަބްލިއުއެޗުއޯގެ ރިޕޯޓުގައި ބުނެފައިވަނީ އިންސާނުންނަށް ކޯވިޑް-19 ޖެހުނީ ޖަނަވާރުންގެ ޒަރިއްޔާއިންކަމަށް ބުރަވެވޭކަމަށެވެ. އަދި ބަލިމަޑުކަން ފެތުރެން މެދުވެރިވީ ލެބޯޓުރީއަކުންކަމަށް ނުބެލެވޭކަމަށްވަނީ ބުނެފައެވެ. ޗައިނާއާއި ދެކުނު އިރުމަތީ އޭޝިޔާގެ ޤައުމުތަކުގައި ވަލުޖަނަވާރު ގެންގުޅޭ ތަންތަނާއި ކޯވިޑް-19އާ އޮތް ގުޅުން އިތުރަށް ބަލަން ޖެހޭކަމަށް ރިޕޯޓުގައިވަނީ ބުނެފައެވެ.
ލިއަންގު ވިދާޅުވީ ބަލީގެ އަސްލު ދެނެގަތުމަށް ޗައިނާއިން އަދިވެސް މަސައްކަތް ކުރާނެކަމަށެވެ. ނަމަވެސް ޑަބުލިޔުއެޗުއޯއާ ގުޅިގެން ކުރާ ދިރާސާތަކުގައި ޗައިނާގެ މަސައްކަތް ނިމުމަކަށް އައިސްފައިވާކަމަށާއި ދެން ސަމާލުކަން ދޭންވީ އެހެން ޤައުމުތަކަށްކަމަށް އޭނާ ވިދާޅުވިއެވެ.