މިޞްރުގެ ސުއޭޒު ކެނަލުގައި އާގުބޯޓެއް ހުރަސްވެ ދަތުރުފަތުރަށް އެ ސަރަޙައްދު ބަންދުވި ސަބަބު ދެނެގަތުމަށް ރަސްމީ ތަހުޤީޤެއް ފަށައިފިއެވެ.
ޕަނަމާގައި ދަފުތަރުކޮށްގެން ދުއްވާ 1،300 ފޫޓުގެ އާގުބޯޓެއްކަމަށްވާ އެވަރ ގިވަން ސުއޭޒު ކެނަލުގައި ހުރަސްވީ މި މަހުގެ 23ވަނަ ދުވަހުއެވެ. އޭގެ ސަބަބުން ދުނިޔޭގެ މައި ވިޔަފާރި ދޮރާޓެއްކަމަށްވާ ސުއޭޒު ކެނަލު ހުރަސް ނުކުރެވި އެތައް ސަތޭކަ ބޯޓެއް އެ ކެނަލުގެ ދެ ފަރާތުގައި ތާށިވިއެވެ. އެ ބޯޓު ފުންކޮށް ސުއޭޒު ކެނަލު އާންމު ދަތުރުފަތުރަށް ހުޅުވާލެވުނީ 6 ދުވަސް ފަހުންނެވެ.
ސުއޭޒު ކެނަލު ހިންގާ މިޞްރުގެ ދަޢުލަތުގެ ޙިއްޞާ އޮންނަ ސުއޭޒު ކެނަލް އޮތޯރިޓީން ބުނީ އެ ކެނަލުގައި ބޯޓު ހުރަސްވާން މެދުވެރިވި ސަބަބު ތަހުޤީޤު ކުރަމުންދާކަމަށެވެ. އެ އިދާރާގެ އިސްވެރިޔާ އުސާމާ ރާބިޢީ ވިދާޅުވީ ބޯޓު އުރެން މެދުވެރިވީ މޫސުން ގޯސްވެ ވައިގަދަވުމުގެ ސަބަބުންނާއި ބޯޓުގައި ތިބި ފަޅުވެރިންނަށް ހެދުނު ގޯސްތަކެއްގެ ސަބަބުންކަމަށް ޤަބޫލުކުރެވޭކަމަށެވެ. އެ އިދާރާއިން ކުރާ ތަހުޤީޤުގައި ބޯޓުގެ ޙާލަތު ބަލައި ބޯޓުގެ ފަޅުވެރިން ޢަމަލުކޮށްފައިވާ ގޮތް ތަފްޞީލުކޮށް ބަލާނެކަމަށް އޭނާ ބުންޏެވެ.
ސުއޭޒު ކެނަލަކީ ދުނިޔޭގައި ދުއްވާ އުޅަނދުތަކުގެ ތެރެއިން 15 އިންސައްތަ އުޅަނދުފަހަރު ބޭނުންކުރާ މުހިންމު ސަރަޙައްދެކެވެ. ހަފުތާއަކަށް އެ ސަރަޙައްދު ބަންދުވުމުން ސުއޭޒު ކެނަލް އޮތޯރިޓީއަށް ދުވާލެއްގެ މައްޗަށް 15 މިލިއަން އެމެރިކާ ޑޮލަރުގެ ގެއްލުމެއްވަނީ ލިބިފައެވެ. އަދި ދުނިޔޭގެ ތެލުގެ އަގުވަނީ 1 އިންސައްތަ ދަށަށް ގޮސްފައެވެ.