ސޫރިޔާއަށް އެހީތެރިވުމަށް 6.4 ބިލިއަން އެމެރިކާ ޑޮލަރު ކަށަވަރުކުރެވިފައިވާކަމަށް އދން ބުނެފިއެވެ.
ސޫރިޔާއާއި އަވަށްޓެރި ޤައުމުތަކުގައި ދިރިއުޅޭ ސޫރިޔާގެ 24 މިލިއަނަށްވުރެ ގިނަ ރައްޔިތުންވަނީ އެމީހުންގެ އާންމު ބޭނުންތައް ފުއްދުމަށް ޤައުމުތަކުގެ އެހީތެރިކަމުގެ މައްޗަށް ބަރޯސާވާން މަޖުބޫރުވެފައެވެ. ސޫރިޔާގެ ރައްޔިތުންނަށް އެހީތެރިކަން ފޯރުކޮށްދިނުމަށް ބޭނުންވާ ފައިސާ ހޯދުމަށް އދއާއި ވިލާތުގެ އިއްތިޙާދު ގުޅިގެން ބޭއްވި ޙަރަކާތުގައި އަމާޒުކޮށްފައިވަނީ 10 ބިލިއަން އެމެރިކާ ޑޮލަރު ހޯދުމަށެވެ. އެއީ ސޫރިޔާގައި ދިރިއުޅޭ ގެދޮރު ގެއްލިފައިވާ މީހުންނަށް އެހީތެރިވުމަށް 4،2 ބިލިއަން ޑޮލަރާއި މެދުއިރުމަތީގެ އެކި ސަރަޙައްދުތަކަށް ހިޖުރަކޮށްފައިވާ ސޫރިޔާގެ ރައްޔިތުންނަށް އެހީތެރިވުމަށް 5.8 ބިލިއަން އެމެރިކާ ޑޮލަރެވެ.
މިއަހަރުގެ ޙާރަކާތުގައި ޤައުމުތަކުން ދިނުމަށް ވަޢުދުވި ޖުމްލަ ޢަދަދަކީ 6.4 ބިލިއަން އެމެރިކާ ޑޮލަރެވެ. ޖަރުމަނުވިލާތުންވަނީ 2.04 ބިލިއަން އެމެރިކާ ޑޮލަރު ދިނުމަށް ވަޢުދުވެފައެވެ. އެއީ ފާއިތުވި ހަތަރު އަހަރުގެ ތެރޭގައި ސޫރިޔާގެ ރައްޔިތުންނަށް އެހީތެރިވުމަށް އެ ޤައުމުން ދޭނެ އެންމެ ބޮޑު ޢަދަދެވެ. ވަކިވަކި ޤައުމުތައް ނުހިމެނޭ ގޮތަށް ވިލާތުގެ އިއްތިޙާދުންވަނީ 650 މިލިއަން އެމެރިކާ ޑޮލަރު ދިނުމަށް ހުށަހަޅައިފައެވެ. ޤަތަރުން 100 މިލިއަން އެމެރިކާ ޑޮލަރު އަދި އެމެރިކާއިން 600 މިލިއަން ޑޮލަރު ދިނުމަށް ވަޢުދުވެފައިވެއެވެ. އިނގިރޭސިވިލާތުން ހުށަހަޅާފައިވަނީ 281 މިލިއަން ޑޮލަރެވެ.
ފާއިތުވި ދެ އަހަރުވެސް ސޫރިޔާއަށް އެހީވުމަށް އދންވަނީ އަހަރަކު 7 ބިލިއަން އެމެރިކާ ޑޮލަރަށްވުރެ ބޮޑު ޢަދަދެއް ހޯދައިފައެވެ. އެހެން އަހަރުތަކަށްވުރެ މި އަހަރު ލިބުނު އެހީގެ ޢަދަދު ދަށްވި ނަމަވެސް މިހާތަނަށް ޔަޤީންކޮށްފައިވާ ޢަދަދު އިތުރުކުރުމަށް އަދިވެސް ވަގުތު އެބައޮތެވެ.