މާރިޗު މަހުގެ 28ވަނަ ދުވަހު އިންޑޮނޭޝިޔާގެ ފައްޅިއަކަށް ދިން ބޮމުގެ ޙަމަލާއާ ގުޅިގެން އެ ޤައުމުގެ ފުލުހުން ހިންގި ބަލައި ފާސްކުރުމުގެ ޙަރަކާތުގައި ގިނަ ޢަދަދެއްގެ ގޮވާ ތަކެތި ހޯދައިފިއެވެ.
ނަޞާރާދީނުގައި ފާހަގަކުރާ އީސްޓަރ ޢީދުގެ ފުރަތަމަ ދުވަހާ ދިމާކޮށް ބޮމުގެ ޙަމަލާއެއް ދީފައިވަނީ އިންޑިނޭޝިޔާގެ މަކައްސަރު ސިޓީގެ ފައްޅިއަކަށެވެ. އެ ޙަމަލާގައި މަރުވެފައިވަނީ ބޮން ގޮއްވާލުމުގައި ޙަރަކާތްތެރިވި 2 މީހުންނެވެ. އެ ޙަމަލާގައި 19 މީހުން ޒަޚަމްވިއެވެ.
ފުލުހުން ބުނީ ޙަމަލާ ދިން ދެ މީހުންނަކީ ޖަމާހް އަންޝަރުތު ދައުލާ، ޖޭއޭޑީ ކިޔާ ޙައްދުފަހަނައަޅާފައިވާ ޖަމާޢަތަކަށް ނިޞްބަތްވާ ދެމަފިރިންކަމަށެވެ. ޖޭއޭޑީއަކީ 2018ވަނަ އަހަރުގެ ތެރޭގައި އިންޑޮނޭޝިޔާގެ ސުރަބަޔާ ސިޓީގެ ފައްޅިއަކަށާއި ފުލުހުންގެ މަރުކަޒަކަށް ޙަމަލާ ދިންކަމަށް ޝައްކުކުރެވޭ ޖަމާޢަތެވެ.
ފުލުހުން ބުނީ ބޮމުގެ ޙަމަލާއާ ގުޅުންހުރި 13 މީހުން އިންޑޮނޭޝިޔާގެ ތިން ސަރަޙައްދަކުން ހައްޔަރުކޮށްފައިވާކަމަށެވެ. އޭގެ ތެރޭގައި ބޮން ހެދުމުގައި ބައިވެރިވި މީހުންކަމަށް ޝައްކުކުރެވޭ މީހުން ހިމެނޭކަމަށް އޭނާ ވިދާޅުވިއެވެ. ފުލުހުން ހިންގި ޙަރަކާތުގައި 5.5 ކިލޯގެ ގޮވާތަކެއްޗާއި ބޮން ހެދުމަށް ބޭނުންކުރާ އެކި ސާމާނު ފެނިފައިވާކަމަށެވެ. އޭގެ ތެރޭގައި ޙައްދުފަހަނައަޅާފައިވާ ޖަމާޢަތްތަކުން ބޮމުގެ ޙަމަލާތައް ދިނުމަށް އާންމުކޮށް ބޭނުންކުރާ ބާރުގަދަ އަދި ނުރައްކާތެރި ކެމިކަލުވެސް ހިމެނެއެވެ.