ދެކުނު އިރުމަތީ އޭޝިޔާގެ އެންމެ ބޮޑު ތެޔޮ އުފައްދާ ކާރުޚާނާގައި އަލިފާން ރޯވެ ފަސް މީހުން ޒަޚަމްވެއްޖެއެވެ.
އިންޑޮނޭޝިޔާގެ ވެސްޓު ޖާވާ ޕްރޮވިންސުގެ ބަލޮންގަންގައި ހުންނަ ތެޔޮ އުފައްދާ ކާރުޚާނާގައި ރޯވުމުން 1000އަށްވުރެ ގިނަ މީހުންވަނީ ރައްކާތެރި ސަރަޙައްދުތަކަށް ގެންގޮސްފައެވެ. ކާރުޚާނާ ހިންގާ އިންޑޮނޭޝިޔާގެ ސަރުކާރުގެ ކުންފުނިކަމަށްވާ ޕާތަމިނާއިން ބުނީ ކާރުޚާނާގައި އަލިފާން ރޯވިސަބަބު ހޯދިފައިނުވާކަމަށާއި އަލިފާން ރޯވީ ހޮނު އެޅުމުގެ ސަބަބުންކަމަށް ބެލެވޭކަމަށެވެ. އަލިފާން ރޯވި ވަގުތު ވިދުމާއެކު ބޯކޮށް ވާރޭ ވެހެމުންދިޔަކަމަށް އެ ކުންފުނިން ބުނެއެވެ. ކާރުޚާނާގައި ހުރި ތެޔޮ ރައްކާކުރާ ތިން ޓޭންކުގައި ރޯވެފައިވާ އަލިފާންގަނޑު އަދިވެސް ނިއްވާލެވިފައެއް ނުވެއެވެ.
އަލިފާނުގެ ހާދިޘާގައި ޒަޚަމްވި ފަސް މީހުންނަކީވެސް ތެޔޮ ކާރުޚާނާއާ ކައިރި ސަރަޙައްދުތަކުގައި ދިރިއުޅޭ މީހުންނެވެ. ތެޔޮ އަނދާ ވަސް ގަދަވެ އޭގެ ސަބަބުން ބައެއް މީހުންގެ ޙާލުވަނީ ގޯސްވެފައެވެ.
ޕާތަމިނާއިން ބުނީ އަލިފާނުގެ ހާދިޘާގެ ސަބަބުން އެ ކުންފުނިން ދެމުންދާ ޚިދުމަތްތަކަށް ބުރުލެއް ނާރާނެކަމަށެވެ. އަދި ހަތަރު ހަފުތާއަށް ފުދޭ މިންވަރަށް ތެޔޮ ރައްކާކޮށްފައި ހުންނާނެކަމަށްވެސް އެ ކުންފުނިން ބުނެއެވެ.