އެންމެ އަވަހަށް ދެން ބާއްވާ އިންތިޚާބެއްގައި މެލޭޝިޔާގެ ބޮޑުވަޒީރު މުޙްޔިއްދީން ޔާސީނުގެ ޕާޓީއަށް ތާޢީދު ނުކުރާނެކަމަށް އެ ޤައުމުގެ އެންމެ ބޮޑު ސިޔާސީ ޕާޓީ، ޔޫއެމްއެންއޯއިން ބުނެފިއެވެ.
ޔޫއެމްއެންއޯއަކީ މެލޭޝިޔާގެ ވެރިކަންކުރާ އިއްތިޙާދުގައި ހިމެނޭ އެންމެ ބޮޑު ޕާޓީއެވެ. ނަމަވެސް ބޮޑުވަޒީރު މުޙްޔިއްދީންގެ ޕާޓީއަށް ސަރުކާރުން އިސްކަން ދޭކަމަށް ބުނެ ޔޫއެމްއެންއޯގެ ބައެއް އިސްވެރިން ތިބީ ހިތްހަމަނުޖެހިފައެވެ. އެ ޕާޓީންވަނީ އަވަސް އިންތިޚާބެއް ބޭއްވުމަށްވެސް ގޮވައިލައިފައެވެ.
ޔޫއެމްއެންއޯގެ ރައީސް އަޙްމަދު ޒާހިދު ޙަމީދީ ވިދާޅުވީ ދެން އޮންނަ އިންތިޚާބެއްގައި ޔޫއެމްއެންއޯ ކުރިއަށް ދާނީ ބަރިސަން ނެސޮނަލް އިއްތިޙާދާއެކުކަމަށެވެ. އަދި ބޮޑުވަޒީރު މުޙްޔިއްދީންގެ ޕާޓީ ހިމެނޭ ގޮތަށް އިތުރު އެއްވެސް ޕާޓީއަކަށް އެއްބާރުލުން ނުދޭނެކަމަށް އޭނާ ވިދާޅުވިއެވެ.
މެލޭޝިޔާގައި ދެން އެންމެ އަވަހަށް އިންތިޚާބެއް ބާއްވާނީ 2023ވަނަ އަހަރުއެވެ. ނަމަވެސް އަވަސް އިންތިޚާބެއް ބޭއްވުމަށް ޔޫއެމްއެންއޯއިން ގޮވާލައި ސަރުކާރަށް ބާރުއެޅުމުން މެލޭޝިޔާގެ ކޯވިޑް-19ގެ ޙާލަތު ރަނގަޅުވުމުން އިންތިޚާބެއް ބާއްވާނެކަމަށް މުޙްޔިއްދީންވަނީ ވިދާޅުވެފައެވެ.
މެލޭޝީޔާގެ ބޮޑުވަޒީރުގެ މަޤާމާ މުޙްޔިއްދީން ޙަވާލުވެވަޑައިގެންފައިވަނީ މިދިޔަ އަހަރުގެ މާރިޗު މަހުގެ 1ވަނަ ދުވަހުއެވެ. ފާއިތުވި 13 މަސް ދުވަހުގެ ތެރޭގައި މެލޭޝިޔާގެ ސިޔާސީ މަސްރަޙުވަނީ ވަރަށް ބޮޑަށް ހަލަބޮލިވެފައެވެ. ސަރުކާރުގެ ތެރޭގައި ބޮޑެތި ބައިބައިވުންތައް އުފެދުމުގެ އިތުރުން އިދިކޮޅު ސިޔާސީވެރިޔާ އަންވަރު އިބްރާހީމުގެ ފަރާތުން ގިނަ ގޮންޖެހުންތަކެއް ދަނީ ކުރިމަތިވަމުންނެވެ.