އިންގްލިޝް ޕްރިމިއަރ ލީގުގެ ކްލަބް އެވަޓަންއިން ހަދަން މަސައްކަތް ކުރަމުންދާ އާ ސެޓޭޑިއަމްއަށް އިންގްލަންޑް ސަރުކާރުގެ ތާއީދު ލިބިއްޖެއެވެ. މިސްޓޭޑިއަމް ހެދުމަށް އެވަޓަންއިން ހުށަހަޅާފައިވަނީ ލިވަޕޫލްގެ ވޯޓަރފްރަންޓް ސަރަހައްދުގައެވެ.
އެވަޓަންއިން އަލަށް ހަދާ 52 ހާސް މީހުންނަށް ޖާގައިގެ މިސްޓޭޑިއަމް ހެދުމަށް ލިވަޕޫލްގެ ކައުންސިލުންވަނީ މިދިޔަ މަހު ހުއްދަ ދީފައެވެ. ނަމަވެސް ސަރުކާރުން ބުނެފައިއޮތީ ހުރިހާ ލިޔެކިޔުންތަކެއް ބަލާ ހުއްދަދޭން އިތުރު ވަގުތު ބޭނުންވާކަމަށެވެ. އަދި ކަމާބެހޭ ފަރާތްތަކުން ބަލަންޖެހޭ ބެލުންތައް ބެލުމަށްފަހު މިހާރު ހުއްދަ ދީފައިވާ ކަމަށް އެވަޓަންއިން ވަނީ ހާމަކޮށްފައެވެ. އެވަޓަންއިން އަލަށް ހަދާ ސްޓޭޑިއަމްއަށް ކިޔުމަށް ހަމަޖެހިފައިވަނީ ބްރެމްލީ މޯ ޑޮކްއެވެ. އަދި މިސްޓޭޑިއަމް 2024 ވަނަ އަހަރަށް ނިމޭނެކަމަށް ބެލެވެއެވެ.
އެވަޓަންއިން މިހާރު ބޭނުން ކުރަމުންދާ ސްޓޭޑިއަމް ކަމަށްވާ ގުޑިސަން ޕާރކްގައި ކުޅެން ފަށާފައިވަނީ 1892 ވަނަ އަހަރެވެ. އަދި ވޭތުވެދިޔަ 25 އަހަރު އެކްލަބުން ގެންދިޔައީ ކުޅޭނެ އާ ސްޓޭޑިއަމްއެއް ހޯދުމުގެ މަސައްކަތް ކުރަމުންނެވެ. އެވަޓަންގެ ފަރާތުން ހާމަކުރިގޮތުގައި އިންގްލަންޑްގެ ކޮމިއުނިޓީސް ސެކްރެޓަރީ ރޮބަރޓް ޖެންރިކް އެވަޓަންގެ ޕްލޭންތައް ބެއްލެވުމަށްފަހު މިހާރު ހުއްދަ ދެއްވާފައިވާކަމަށެވެ. އަދި މިކަންވަނީ އިންގްލަންޑްގެ މިނިސްޓްރީ އޮފް ހައުސިންގ، ކޮމިއުނިޓީސް އެންޑް ލޯކަލް ގަވަމަންޓް އިންވެސް ޔަގީން ކޮށްދިފައެވެ. އެވަޓަންއިން މިކަން ހާމަކުރުމާއެކު އެވަޓަންގެ ސްޕޯޓަރުންނާއި ކުރީގެ ކުޅުންތެރިންނާއި ސަޕޯޓަރުންގެ ގްރޫޕްތަކުން ގެންދަނީ ސޯޝަލް މީޑިއާގައި އެފަރާތްތަކުގެ ޝުއޫރުތަށް އުފަލާއެކު ފާހަގަކުރަމުންނެވެ. އެވަޓަންއަށް އެންމެ ގިނަ ދުވަހު ކެޕްޓަންކަން ކުރި ކެވިން ރެޑްކްލިފް ހާމަކުރިގޮތުގައި މިއަދު ހަގީގަތަކަށް މިވީ ވަރަށް ގިނަ ދުވަހެއްގެ އިންތިޒާރު ކަމަށެވެ. އަދި އެއްއިރެއްގަ މިއީ ދުވަހުވެސް ވާނެކަމެއް ބާއޭވެސް ހީވާ ހިސާބަސް ދިޔަކަމަށް އޭނާ ހާމަކޮށްފައިވެއެވެ.
ނަމަވެސް މިހާދުވަސްކޮށްފަ ގުޑިސަން ޕާކް ދޫކޮށްލަންވީމަ އެކަމާ ދެރަވާނެ ވަރަށް ގިނަ އެވަޓަން ސަޕޯޓާރުންވެސް ތިބޭނެއެވެ.