ރިޔާސީ އިތުރު ދަޢުރަކަށް ކުރިމަތިލައްވަން އުންމީދު ކުރައްވާކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އުމުރުން 78 އަހަރުގެ ޖޯ ބައިޑަނަކީ އެމެރިކާގެ ރައީސްކަން ކުރައްވާ އުމުރުން އެންމެ ދޮށީ ބޭފުޅާއެވެ. އާންމު ގޮތެއްގައި ރިޔާސީ ފުރަތަމަ ދަޢުރު ފުރިހަމަ ކުރައްވާ ބޭފުޅުން ދެވަނަ ދަޢުރަކަށް ކުރިމަތިލައްވައެވެ. ނަމަވެސް ބައިޑަންގެ އުމުރު ދޮށިވުމުން އިތުރު ދަޢުރަކަށް އޭނާ ކުރިމަތިލެއްވުމަށް ބޭނުންފުޅުވާނެކަމަށް ގިނަ ބަޔަކަށް މީގެ ކުރިން ޤަބޫލެއް ނުކުރެވެއެވެ.
މިދިޔަ ޖަނަވަރީ މަހުގެ ތެރޭގައި އެމެރިކާގެ ރައީސްކަމާ ޙަވާލުވެވަޑައިގެންނެވިފަހުން ފުރަތަމަ ފަހަރަށް ވައިޓު ހައުސްގައި ބޭއްވި ނޫސްވެރިންގެ ބައްދަލުވުމުގައި ބައިޑަންގެ ސިޔާސީ ކުރިމަގާމެދު ނޫސްވެރިންވަނީ ސުވާލުކޮށްފައެވެ. އެ ސުވާލުތަކަށް ޖަވާބު ދެއްވަމުން ބައިޑަން ވިދާޅުވީ ރިޔާސީ އިތުރު ދަޢުރަކަށް ކުރިމަތިލެއްވުމަށް އުންމީދުކުރައްވާކަމަށެވެ. އަދި އެފަދަ ޙާލަތެއްގައި އެމަނިކުފާނުގެ ރަނިންމޭޓުގެ ޙައިޞިއްޔަތުން އިންތިޚާބުގައި ވާދަކުރައްވާނީ މިހާރުގެ ނައިބު ރައީސް ކަމާލާ ހެރިސްކަމަށް ބައިޑަން ވިދާޅުވިއެވެ.
ނޫސްވެރިންގެ ބައްދަލުވުމުގައި ބައިޑަންވަނީ ގިނަ ދާއިރާތަކަކާ ގުޅޭގޮތުން ވާހަކަދައްކަވައިފައެވެ. އެގޮތުން އެމެރިކާއަށް ކުރިމަތިވެފައިވާ ހިޖުރަވެރިންގެ މައްސަލައާ ގުޅޭގޮތުންވެސް އޭނާ ވާހަކަދެއްކެވިއެވެ. އެކަމާ ގުޅޭގޮތުން ބައިޑަން ވިދާޅުވީ އެ މައްސަލަ ގޯސްވެފައިވަނީ ބައިޑަންގެ ކުރިން ވެރިކަންކުރި ރިޕަބުލިކަން ޕާޓީގެ ސިޔާސަތުތަކުގެ ސަބަބުންކަމަށް ޤަބޫލުކުރައްވާކަމަށެވެ. ކުރީ ސަރުކާރުން ސަރަޙައްދީ ރޮނގު ހުރަސްކޮށް ޤަވައިދާ ޚީލާފަށް އެމެރިކާއަށް އެތެރެވާ ކުޑަކުދިންނަށް ބޯހިޔާވަހިކަމާއި އަޅައިލުން ދޭން ދެކޮޅު ހެދިކަމަށް ބައިޑަން ވިދާޅުވިއެވެ. އަދި މިހާރުގެ ސަރުކާރުން އެގޮތަށް ޢަމަލު ނުކުރައްވާނެކަމުގެ ޔަޤީންކަން އޭނާ ދެއްވިއެވެ.
ޤާނޫނުހަދާ މަޖިލީހުގައި ވެރިކަންކުރާ ޑިމޮކްރެޓިކް ޕާޓީން ކުރާ މަސައްކަތްތަތަކަށް އިދިކޮޅު ރިޕަބުލިކަން ޕާޓީން ހުރަސް ނޭޅޭނެ ގޮތްތަކެއް ހަދަންޖެހޭކަމަށްވެސް ބައިޑަން ވިދާޅުވިއެވެ. އެގޮތުން ބިލެއް ފާސްކުރުމަށް 100އަކުން 60 ވޯޓު ހޯދަންޖެހޭ ގޮތަށް އޮންނަ އޮތުން ބަދަލުކުރަންޖެހޭކަމަށް އޭނާ ވިދާޅުވިއެވެ.
އޭގެ އިތުރުން އޭނާގެ ވެރިކަމުގެ ފުރަތަމަ 100 ދުވަހުގެ ތެރޭގައި އެމެރިކާގައި ކޯވިޑް-19އަށް ވެކްސިން ޖަހައި މީހުންގެ ޢަދަދު 100 މިލިއަނުން 200 މިލިއަނަށް އިތުރު ކުރައްވަން ނިންމަވާފައިވާކަމަށްވެސް ބައިޑަން ވިދާޅުވިއެވެ. 42 ދުވަހުގެ ތެރޭގައި ކާމިޔާބުކަމާއެކު 100 މިލިއަން މީހުންނަށް ވެކްސިން ދީފައިވާކަންވެސް އޭނާ ފާހަގަކުރެއްވިއެވެ.