މެއި މަހުގެ 1ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާގެ ސިފައިން އަނބުރާ ޤައުމަށް ގެންނަން ދަތިވާނެކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ. ބައިޑަން އެހެން ވިދާޅުވީ އަފްޣާނިސްތާނުގައި ޞުލްޙަ ޤާއިމުކުރުމަށް އެ ޤައުމުގެ ސަރުކާރާއި އެ ޤައުމުގައި ޙަރަކާތްތެރިވާ ހަނގުރާމަވެރި ޠާލިބާން ޖަމާޢަތާ ދެމެދު މަޝްވަރާ ކުރުމަށް އެމެރިކާއިން ބާރު އަޅަމުންދާ ދަނޑިވަޅެއްގައެވެ.
އެމެރިކާގެ ކުރީގެ ރައީސް ޑޮނަލްޑް ޓްރަންޕުގެ ސަރުކާރުންވަނީ ޠާލިބާނުންނާއެކު ޞުލްޙައިގެ އެއްބަސްވުމެއްގައި މިދިޔަ އަހަރުގެ ފެބްރުއަރީ މަހުގެ ތެރޭގައި ސޮއިކޮށްފައެވެ. އެ އެއްބަސްވުމުގެ ދަށުން އަންނަ މެއި މަހުގެ 1ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާ ސިފައިން ބާލަން ޖެހެއެވެ. އެ އެއްބަސްވުމުގެ ދަށުން ފާއިތުވި އަހަރުގެ ތެރޭގައި އަފްޣާނިސްތާނުގައި ތިބި އެމެރިކާގެ ގިނަ ޢަދަދެއްގެ ސިފައިންވަނީ އަނބުރާ ޤައުމަށް ގެންގޮސްފައެވެ. ނަމަވެސް 2،500އެއްހާ އެމެރިކާ ސިފައިން އަދިވެސް އަފްޣާނިސްތާނުގައި އެބަ ތިއްބެވެ.
މިދިޔަ ޖަނަވަރީ މަހުގެ ތެރޭގައި އެމެރިކާގެ ރައީސްކަމާ ބައިޑަން ޙަވާލުވެވަޑައިގެންނެވިފަހުން ފުރަތަމަ ފަހަރަށް ވައިޓު ހައުސްގައި ބޭއްވި ނޫސްވެރިންގެ ބައްދަލުވުމުގައި ކުރިއަށް އޮތް ދުވަސްތަކުގައި އެމެރިކާގެ ފައުޖުތައް އަނބުރާ ޤައުމަށް ގެންނަވާނެކަމުގެ ޔަޤީންކަން އޭނާ ދެއްވިއެވެ. ނޫސްވެރިން ކުރި ސުވާލަކަށް ޖަވާބު ދެއްވަމުން ބައިޑަން ވިދާޅުވީ އެމެރިކާގެ ސިފައިން އަފްޣާނިސްތާނުގައި އަންނަ އަހަރު ތިބޭނެކަމަކަށް ނުބެލެވޭކަމަށެވެ.
ކުރިން އެއްބަސްވެފައިވާ ގޮތަށް މެއި މަހުގެ 1ވަނަ ދުވަހުގެ ކުރިން އެމެރިކާގެ ފައުޖުތައް އަފްޣަނިސްތާނުން ނުބާލައިފިނަމަ ބޭރުގެ ފައުޖުތަކަށް ޙަމަލާ ދޭނެކަމުގެ އިންޒާރު ޠާލިބާނުންވަނީ ދީފައެވެ.