އިސްރާއީލުގެ އާންމު އިންތިޚާބުގައި އެ ޤައުމުގެ ބޮޑުވަޒީރު ބެންޔަމިން ނަތަންޔާހޫގެ ލިކޫޑް ޕާޓީއަށް ޤާނޫނުހަދާ މަޖިލީހުގެ އަޣުލަބިއްޔަތު ލިބޭނެކަމާމެދު ސުވާލު އުފެދިއްޖެއެވެ.
ފާއިތުވި ދެ އަހަރު ދުވަހުގެ ތެރޭގައި އިސްރާއީލުގައި ބޭއްވި ހަތަރުވަނަ އާންމު އިންތިޚާބުގެ ވޯޓުލުން މާރިޗު މަހުގެ 22ވަނަ ދުވަހުވަނީ ބާއްވައިފައެވެ. އެ އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ 67.2 އިންސައްތަ މީހުންވަނީ ވޯޓުލައިފައެވެ. އިންތިޚާބުގެ ރަސްމީ ނަތީޖާ ލިބޭނީ ކުރިއަށް އޮތް ހަފުތާގެ ތެރޭގައެވެ.
އެންމެ ފަހުގެ ނަތީޖާއިން ދައްކާގޮތުގައި 120 ގޮނޑީގެ މައްޗަށް އެކުލެވޭ ޤާނޫނުހަދާ މަޖިލީހުގެ އެންމެ ގިނަ ގޮނޑި ކާމިޔާބުކޮށްފައިވަނީ ނަތަންޔާހޫގެ ކަނާތު ފިޔައިގެ ލިކޫޑް ޕާޓީންނެވެ. އެ ޕާޓީންވަނީ މިހާތަނަށް 53 ގޮނޑި ކާމިޔާބުކޮށްފައެވެ. ނަމަވެސް ސަރުކާރެއް އެކުލަވާލުމުގެ ބާރު ލިބޭ މިންވަރަށް އެ ޕާޓީއަށް ގޮނޑި ކާމިޔާބުކުރެވޭނެކަމަކަށް ނުބެލެވެއެވެ. ސަރުކާރު އެކުލަވާލުމަށް ބޭނުންވާ އަޣުލަބިއްޔަތު ހޯދުމަށް 61 ގޮނޑި ކާމިޔާބު ކުރަން ޖެހެއެވެ. އިދިކޮޅު ގިނަ ޕާޓީތަކުންވަނީ މިހާތަނަށް 57 ގޮނޑި ޔަޤީންކޮށްފައެވެ.
އިސްރާއީލުގެ ދިފާޢީ ވަޒީރުކަން ކުރިން ކުރައްވާފައިވާ ނަފުތާލީ ބެނެޓުގެ ޔަމީނާ ޕާޓީގެ ތާޢީދު ލިކޫޑް ޕާޓީއަށް ލިބިއްޖެނަމަ އެ ޕާޓީއަށް އަޣުލަބިއްޔަތު ލިބުމުގެ ފުރުޞަތު އޮތްކަމަށް ބައެއް މާހިރުން ބުނެއެވެ. ނަމަވެސް ބެނެޓުގެ ތާއީދާއެކުވެސް ނަތަންޔާހޫއަށް ތާޢީދުކުރާ ޕާޓީތަކާއި އިދިކޮޅު ޕާޓީތަކަށް ލިބޭ ގޮނޑީގެ ޢަދަދު ހަމަހަމަވުން ވަރަށް ގާތެވެ.