އިނގިރޭސި އެފްއޭ ކަޕްގެ ސެމީފައިނަލުން ލެސްޓަރ ސިޓީ ޖާގަހޯދައިފިއެވެ. މިމުބާރާތުގެ ސެމި ފައިނަލުން ލެސްޓަރ ޖާގަހޯދީ ކްއާޓަރ ފައިނަލްގައި މެންޗެސްޓަރ ޔުނައިޓެޑާއި ބައްދަލުކުރިމެޗް ކާމިޔާބުކޮށްގެންނެވެ. ލެސްޓަރގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު އެއްލަނޑުންނެވެ.
މިމެޗްގައި ލެސްޓަރއިން ރަނގަޅު ކުޅުމެއް ދެއްކިއިރު ޔުނައިޓެޑްގެ ފަރާތުން މާއެދެވޭ ރަނގަޅު ކުޅުމުމެއް ފެނިގެނެއް ނުދިޔައެވެ. މިމެޗްގެ ފުރަތަމަ ލަނޑު މެޗްގެ 24 ވަނަ މިނެޓްގައި ޖަހައިދިނީ ލެސްޓަރއަށް ފަހަކަށް އައިސް ރަނގަޅު ކުޅުމެއް ދައްކަމުންދާ ކެލޭޗީ އިއެނާޗިއޯއެވެ. މިމެޗްގައި ޔުނައިޓުންޖެހި ހަމައެކަނި ލަނޑު މެޗްގެ 38 ވަނަ މިނެޓްގައި ޖަހައިދިނީ ޒުވާން ފޯވަޑް މޭސަން ގްރީންވުޑެވެ. މިމެޗްގެ ދެވަނަ ހާފްގައި ލެސްޓަރގެ ކުޅުން ފެނިގެންދިޔައީ ޔުނައިޓެޑަށްވުރެ މާބޮޑަށްވެސް ރަނގަޅުކޮށެވެ. އަދި ނަތީޖާއެއްގެ ގޮތުން މެޗްގެ 52 ވަނަ މިނެޓްގައި ޔޫރީ ޓިއެލަމެންސް ލަނޑެއް ޖަހައި މިމެޗްގައި ދެވަނަ ފަހަރަށް ލެސްޓަރއަށް ލީޑު ނަގައިދިނެވެ. މިލަނޑާއެކު ޔުނައިޓެޑުން އެޓީމްގެ ކުޅުން ރަނގަޅުކޮށް ލެސްޓަރގެ ގޯލަށް ނުރައްކާކުރިތަން ފެނިގެންދިޔަވެ. ނަމަވެސް ޔުނައިޓެޑަށް ލެސްޓަރގެ ޑިފެންސް ފޫއަޅުވާލެވޭގޮތެއް ނުވިއެވެ. މިމެޗްގައި ލެސްޓަރއިން ޖެހި ފަހުލަނޑު މެޗްގެ 78 ވަނަ މިނެޓްގައި ޖަހައިދިނީ ފުރަތަމަ ލަނޑުވެސް ޖަހައިދިނިން އިއެނާޗިއޯއެވެ.
މިކާމިޔާބީއާއެކު ލެސްޓަރމިވަނީ ވޭތިވެދިޔަ 39 އަހަރުގެ ތެރޭގައި ފުރަތަމަ ފަހަރަށް މިމުބާރާތުގެ ސެމީފައިނަލަށް ދަތުރުކޮށްފައެވެ. ސެމީފައިނަލްގައި ލެސްޓަރ ބައްދަލުކުރާނީ ސައުތެމްޓަންއާއެވެ. އަދި ދެވަނަ ސެމީފައިނަލް މެޗްގައި ބައްދަލުކުރާނީ ޗެލްސީއާއި މެންޗެސްޓަރ ސިޓީއެވެ. މިމެޗުން ބަލިވުމުން މިސީޒަންގައި ޔުނައިޓެޑަށް ތައްޓެއް ކާމިޔާބު ކުރުމަށް މިހާރު އޮތް ހަމައެކަނި ފުރުސަތެއްގެ ގޮތުގައި ފެއްނަން އޮތީ ޔޫރޮޕާ ލީގެވެ.