އަންހެނުންނަށް ރައްކާތެރިކަން ކަށަވަރުކޮށްދޭ ބައިނަލްއަޤްވާމީ މުއާޙަދާއިން ތުރުކީވިލާތް ވަކިވެއްޖެ
އަނިޔާވެރިކަމުން އަންހެނުންނަށް ރައްކާތެރިކަން ކަށަވަރުކޮށްދޭ ބައިނަލްއަޤްވާމީ މުއާޙަދާއިން ތުރުކީވިލާތް ވަކިވެއްޖެއެވެ. މީގެ ދިހަ އަހަރު ކުރިން ތުރުކީވިލާތުގެ އިސްތަންބޫލުގައި ބޭއްވި ބައްދަލުވުމެއްގައި އެކުލަވާލި އިސްތަންބޫލު ކޮންވެންޝަންގައި އެންމެ ފުރަތަމަ ސޮއިކުރި ޤައުމަކީ ތުރުކީވިލާތެވެ.
އަންހެނުންނަށް ލިބޭ ގެވެށި އަނިޔާއިން އެ މީހުންނަށް ރައްކާތެރިކަން ކަށަވަރުކޮށްދޭ މުއާޙަދާ ތަންފީޒުކުރުން ތުރުކީވިލާތުން ހުއްޓާލިކަން އިޢުލާނު ކުރެއްވީ އެ ޤައުމުގެ ރައީސް ރަޖަބު ޠައްޔިބު އުރުދުޣާނެވެ. ނަމަވެސް މުއާޙަދާއިން ތުރުކީވިލާތް ވަކިވި ސަބަބެއް އޭނާ ވިދާޅެއް ނުވެއެވެ. ނަމަވެސް ސަރުކާރުގެ އިސްވެރިން ބުނީ ތުރުކީވިލާތުގައި އަންހެނުންގެ ޙައްޤުތައް ރައްކާތެރިކުރުމަށް ބޭރުގެ ޤާނޫނުތަކާއި މުއާޙަދާތަކަށްވުރެ އަމިއްލަ ޤައުމުގެ ޤާނޫނުތައް ރަނގަޅުވާނެކަމަށެވެ.
އަންހެނުންނަށް ދޭ އަނިޔާއާއި އަންހެނުން މެރުން ތުރުކީވިލާތުގައި އިތުރުވެފައިވާކަމަށް އިންސާނީ ޙައްޤުތަކަށް މަސައްކަތްކުރާ ޖަމުޢިއްޔާތަކުންވަނީ ފާހަގަކޮށްފައެވެ. އެގޮތުން މި އަހަރުގެ މިހާތަނަށް ތުރުކީވިލާތުގައި 77 އަންހެނުންވަނީ މަރާލައިފައެވެ. މިދިޔަ އަހަރުގެ ތެރޭގައި 409 އަންހެނުން މަރާލާފައިވާކަމަށް އެ ޖަމުޢިއްޔާތަކުން ބުނެއެވެ.