އެމެރިކާގެ ރައީސް ޖޯ ބައިޑަން ރިޔާސީ މަތިންދާބޯޓަށް އަރައިވަޑައިގަންނަވަނިކޮށް ސިޑި މައްޗަށް ކަހާލައިގެން ވެއްޓިއްޖެއެވެ
.
އެމެރިކާގެ ވެރިރަށް ވޮޝިންޓަނުން އެޓްލާންޓާއަށް ދަތުރު ކުރެއްވުމަށް މަތިންދާބޯޓަށް ވަރަށް ހަލުވިކޮށް ރައީސް ބައިޑަން އަރައިވަޑައިގަންނަވަނިކޮށް އެމަނިކުފާނުވަނީ ދެ ފަހަރަކު ފައި އޮޅިވަޑައިގަތުމަށްފަހު ވެއްޓިފައެވެ. އެ ވަގުތު އެމަނިކުފާނުގެ ވައަތު ކަކޫވަނީ ސިޑިމަތީގައި ޖެހިފައެވެ. އެއަށްފަހު އެ މަނިކުފާނު ސިޑިން އަރައިވަޑައިގެންފައިވަނީ ތަންކޮޅެއް މަޑުންނެވެ.
The White House said President Biden is fine after twice losing his footing while climbing up the steps to Air Force One https://t.co/8zaZ7eL1oZ pic.twitter.com/bLpj2Q2CZ0
— Reuters (@Reuters) March 20, 2021
އެމެރިކާގެ ރިޔާސީ ގަނޑުވަރު ވައިޓް ހައުސުން ބުނީ ޖޮއިންޓް ބޭސް އެންޑްރޫސްގައި ރައީސް ބައިޑަން މަތިންދާބޯޓަށް އަރައިވަޑައިގެންނެވި ވަގުތު ވަރަށް ވައި ގަދަކަމަށާއި އެ ޙާދިޘާ މެދުވެރި ސަބަބަކަށް ވައިގަދަވުން އެކަށީގެންވާކަމަށެވެ. އެ ހާދިޘާއަށްފަހު ބައިޑަންގެ ޙާލުކޮޅު ރަނގަޅުކަމަށާއި އޭނާއަށް ބޮޑު އަނިޔާއެއް ނުވާކަމަށް ވައިޓް ހައުސުން ބުނެއެވެ.
މިދިޔަ ނޮވެންބަރު މަހުގެ ތެރޭގައި ރައީސް ބައިޑަންގެ ކުއްތާތަކާއެކު އުޅުއްވަނިކޮށް އެމަނިކުފާނުގެ ކަނައަތު ފަޔަށްވަނީ އަނިޔާވެފައެވެ. އުމުރުން 78 އަހަރުފުޅުގެ ބައިޑަންއަކީ އެމެރިކާގެ ރައީސްކަން ކުރައްވާ އުމުރުން އެންމެ ދޮށީ ބޭފުޅެވެ.