ޕާކިސްތާނުގެ ބޮޑުވަޒީރު އިމްރާން ޚާނަށް ކޯވިޑް-19 ޖެހިއްޖެއެވެ.
ކޯވިޑް-19 ވެކްސިންގެ ފުރަތަމަ ޑޯޒް އިމްރާން ޚާން ޖައްސަވާފައިވަނީ މީގެ ދެ ދުވަސް ކުރިންނެވެ. ކޯވިޑް-19އަށް އެމަނިކުފާނު ތަޚުލީލު ކުރީ ކޮންމެވެސް ވަރެއްގެ ކެއްސުމެއް ތަޖުރިބާ ކުރެއްވުމުންނެވެ. ބަލި ޖެހިފައިވާކަން އެނގުމުން އެމަނިކުފާނުވަނީ ގެކޮޅުގައި އެކަހެރިވެވަޑައިގެންފައެވެ. ކޮންމެވެސް ވަރެއްގެ ހުމެއް ހުރި ނަމަވެސް އެމަނިކުފާނުގެ ޙާލުކޮޅު ރަނގަޅުކަމަށް ޕާކިސްތާނުގެ ސަރުކާރުން ބުނެއެވެ.
ފާއިތުވި ދުވަސްތަކުގައި ބޮޑުވަޒީރު އިމްރާން ޚާންވަނީ ގިނަ ބައްދަލުވުންތަކެއްގައި ބައިވެރިވެވަޑައިގެންފައެވެ. އެގޮތުން ގިނަ ޢަދަދެއްގެ މީހުން ހާޒިރުވި ސަލާމަތީ ބައްދަލުވުމެއްގައި ބައިވެރިވެވަޑައިގެން އެ ބައްދަލުވުގެ ބައިވެރިންނާ މުޚާތަބު ކުރައްވާފައިވަނީ މާސްކު ނާޅުއްވައެވެ. އަދި ފާއިތުވި ދެ ތިން ދުވަހުގެ ތެރޭގައި ގެދޮރު އެޅުމުގެ މަޝްރޫޢުއެއްވެސް އެމަނިކުފާނުވަނީ އިފްތިތާހު ކޮށްދެއްވައިފައެވެ.
ދުނިޔޭގެ ގިނަ ޢަދަދެއްގެ އިސްވެރިންނަށް މީގެ ކުރިންވަނީ ކޯވިޑް-19 ޖެހިފައެވެ. އޭގެ ތެރޭގައި އިނގިރޭސިވިލާތުގެ ބޮޑުވަޒީރު ބޮރިސް ޖޮންސަންއާއި ފަރަންސޭސިވިލާތުގެ ރައީސް އެމަނުއަލް މެޚްރޮންއާއި ސޫރިޔާގެ ރައީސް ބައްޝާރުލް އަސަދާއި އެމެރިކާގެ ކުރީގެ ރައީސް ޑޮނަލްޑް ޓްރަންޕު ހިމެނިވަޑައިގަންނަވައެވެ.