އެންމެ އެކަށީގެންވާ ވަގުތުގައި އެމެރިކާގެ ރައީސް ޖޯ ބައިޑަންނާއި ރަޝިޔާގެ ރައީސް ވުލަޑްމީރު ޕުޓިން ބައްދަލުކުރައްވާނެކަމަށް އެމެރިކާއިން ބުނެފިއެވެ.
މި ހަފުތާގެ ތެރޭގައި ޕުޓިންނަކީ ޤާތިލެއްކަމަށް ބައިޑަން ވިދާޅުވުމުން އެމެރިކާއާއި ރަޝިޔާއާ ދެމެދު އޮންނަ ގުޅުންވަނީ ވަރަށް ބޮޑަށް ނުތަނަވަސްވެފައެވެ. އެ ވާހަކަތަކާ ގުޅިގެން އެމެރިކާއިން މަޢާފަށް އެދެން ޖެހޭނެކަމަށް ރަޝިޔާއިންވަނީ ބުނެފައެވެ. އަދި ޤާތިލަކު ވަކިކުރަން އެނގޭނީ ޤާތިލަކަށްކަމަށް ޕުޓިންވަނީ ވިދާޅުވެފައެވެ. ބައިޑަންއާއި ޕުޓިންއާ ދެމެދު އިންޓަނެޓު މެދުވެރިކޮށް މަޝްވަރާ ކުރުމަށް ޕުޓިންވަނީ ގޮވައިލައްވައިފައެވެ.
އެމެރިކާގެ ރިޔާސީ ގަނޑުވަރު ވައިޓް ހައުސުން ބުނީ އެންމެ ރަނގަޅު ވަގުތު ޖެހުމުން ބައިޑަންއާއި ޕުޓިން ބައްދަލުކުރައްވާނެކަމަށެވެ. ދެ ޤައުމުގެ މަސްލަހަތު ހިމެނޭ ކަންކަމުގައި ދެ ޤައުމުންވެސް އެކުގައި މަސައްކަތް ކުރުމުގައި ދެމިތިބެންޖެހޭކަމަށް ދެ ރައީސުން އެއްބަސްވެވަޑައިގަންނަވާކަމަށް ވައިޓު ހައުސުންވަނީ ބުނެފައެވެ.