އަފްޣާނިސްތާނުގެ ދާޚިލީ ވަޒީރު މައްސޫދު އަންދަރާބީ މަޤާމުން ވަކިކޮށްފިއެވެ.
ދާޚިލީ ވަޒީރު މަޤާމުން ދުރުކުރި ސަބަބު އަފްޣާނިސްތާނުގެ ސަރުކާރުން ހާމަކޮށްފައެއް ނުވެއެވެ. ނަމަވެސް ސަލާމަތީ ކަންކަމާބެހޭ އިސް ފަރާތަކުން ބުނީ އެ ޤައުމުގައި ޙަރަކާތްތެރިވާ ހަނގުރާމަވެރި ޖަމާޢަތްތަކާ ދެކޮޅަށް ފިޔަވަޅު އެޅުއްވުމުގައި އަންދަރާބީ ނުކުޅެދިފައިވާކަމަށެވެ.
މާރިޗު މަހުގެ 18ވަނަ ދުވަހުގައި ހަނގުރާމަވެރި ޖަމާޢަތަކުން ދިން ޙަމަލާއެއްގައި ހެލިކޮޕްޓަރެއް ވައްޓާލުމުން އަފްޣާނިސްތާނުގެ ސަލާމަތީ ބާރުތަކަށް ނިސްބަތްވާ ނުވަ މީހުންވަނީ މަރުވެފައެވެ. ފާއިތުވި މަސްތަކުގައި އަފްޣާނިސްތާނުގައި ދީފައިވާ ގިނަ ޙަމަލާތަކެއްގެ ފަހަތުގައިވަނީ އެ ޖަމާޢަތެވެ. އެ ޖަމާޢަތުގެ އިސްވެރިޔާ ހައްޔަރުކުރުމަށް މީގެ އެތައް ހަފުތާއެއް ކުރިން ރައީސް އަޝްރަފް ޣަނީވަނީ އަންގަވައިފައެވެ. ބެލެވޭ ގޮތުގައި އަންދަރާބީ މަޤާމުން ދުރުކޮށްފައިވަނީ އެ ޖަމާޢަތުގެ އިސްވެރިޔާއާ ދެކޮޅަށް ފިޔަވަޅު އަޅާފައި ނުވާތީއެވެ.
ހެލިކޮޕްޓަރު ވައްޓާލުމުގައި ބައިވެރިވި މީހުން ހައްޔަރުކޮށް އެމީހުންނަށް އަދަބު ދެއްވާނެކަމަށް ރައީސް އަޝްރަފް ޣަނީވަނީ ވިދާޅުވެފައެވެ.