ރާއްޖެއާ ބަންގުލަދޭޝާއި ދެމެދު ވައިގެ މަގުން ކުރާ ދަތުރުތަކުގެ އިތުރުން ކަނޑުގެ މަގުން ދަތުރުތައް ފެށުމަށް މަސައްކަތްކުރައްވަމުން ގެންދަވާކަމަށް ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބަންގްލަދޭޝްއަށް ކުރެއްވި ފުރަމާނަ ދަތުރުފުޅުގައި ބޭއްވެވި ރަސްމީ މަޝްވަރާތަކުގެ މައުލޫމާތު ނޫސްވެރިންނާއި ހިއްސާކުރައްވަމުންނެވެ.
ބަންގުލަދޭޝްގެ ބާނީ ބަންގު ބަންދު ޝެއިޚް މުޖީބުއްރަޙްމާން ދުނިޔޭގެ އަލިކަން ދެކެވަޑައިގެންތާ 100 އަހަރު ފުރޭ މުނާސަބަތު ފާހަގަކުރުމަށް ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ދަޢުވަތު ދެއްވީތީ އެކަމަށްޓަކައި މިނިސްޓަރ ޢަބުދުﷲ ޝާހިދު ވަނީ ބަންގްލަދޭޝްގެ ރައީސް އެމް.ޑީ. ޢަބްދުލް ޙާމިދަށް ޝުކުރު އަދާކުރެއްވިއެވެ. ބަންގްލަދޭޝްގެ ބާނީ ޝެއިޚް މުޖީބުއްރަޙްމާން އެ ޤައުމަށް މިނިވަންކަން ހޯދައިދެއްވުމަށާއި ޑިމޮކްރަސީ ގެނެސްދެއްވުމަށް ކުރެއްވި މަސައްކަތްތަކަކީ ސަރަޙައްދުގެ އެހެން ޤައުމުތަކުންވެސް ފާހަގަކުރާ ލާމަސީލު މަސައްކަތްތަކެއްކަން މިނިސްޓަރ ޝާހިދު ފާހަގަކުރެއްވިއެވެ.
ރާއްޖެ އާއި ބަންގްލަދޭޝްގެ ޒަމާންވީ ގާތްގުޅުމުގެ މައްޗަށް އަލިއަޅުވާލައްވާ ވާހަކަދައްކަވަމުން މިނިސްޓަރ ޝާހިދު ވިދާޅުވީ ދެ ޤައުމުގެ ދެމެދުގައި ބޭއްވި ރަސްމީ ވާހަކަތަކާއި ސޮއިކުރި އެއްބަސްވުންތަކުން ދެ ޤައުމުގެ ގުޅުން އިތުރަށް ބަދަހިވެގެންދާނެކަމަށެވެ.
މީގެއިތުރުން މޫސުމަށް އަންނަ ބަދަލުތަކާއި ދެމެހެއްޓެނިވި ތަރައްޤީ އިތުރުން ދެ ޤައުމުން އިސްކަންދޭ ބައިނަލްއަޤްވާމީ މައްސަލަތަކާއި ދެ ޤައުމުގެ މެދުގައި ވިޔަފާރި އާއި އިންވެސްޓުމަންޓް ފުރުސަތުތައް އިތުރުކުރުމަށް މަޝްވަރާކުރެއްވިކަމަށްވެސް މިނިސްޓަރ ޝާހިދު ވިދާޅުވިއެވެ.
ދެ ޤައުމުގެ އެންމެ އިސްވެރިންގެ މަޝްވަރާތަކުގައި ބަންގްލަދޭޝްހެ ޤައުމީ އެއަރލައިން "ބައިމަން ބަންގްލަދޭޝް އެއާރލައިންސް" ގެ
ރަސްމީ ދަތުރުތައް ވަރަށް އަވަހަށް ރާއްޖެއަށް ފަށާނެކަން ބޮޑުވަޒީރު ބޮޑުވަޒީރު ޝައިޚް ޙަސީނާ އިއުލާންކުރެއްވިކަންވެސް މިނިސްޓަރ ޝާހިދު ފާހަގަކުރެއްވިއެވެ.
ރަސްމީ މަޝްވަރާތަކަށް ފަހު ދެ ޤައުމުގެ ޚާރިޖީ ވަޒީރުން ދެއްވި ގުޅިފައިވާ ބަޔާން ނިންމަވާލައްވަމުން މިނިސްޓަރ ޝާހިދު ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބަންގުލަދޭޝްއަށް ކުރެއްވި ފުރަމާނަ ދަތުރުފުޅުގައި އެމަނިކުފާނާއި އެމަނިކުފާނުގެ އަނބިކަނބަލުން ފަޒްނާ އަޙްމަދާއި މި ދަތުރުގައި ބައިވެރިވެ ވަޑައިގެންނެވި ދިވެހި ސަރުކާރުގެ އިސް އޮފިޝަލުންގެ ވަފުދަށް ބަންގުލަދޭޝްގެ ސަރުކާރުން އަދާކުރެއްވި މެހުމާންދާރީއާ ބެހެއްޓެވި ގާތްކަމަށްޓަކައި އެ ޤައުމުގެ ބޮޑުވަޒީރާ ސަރުކާރަށް ޝުކުރު އަދާކުރައްވާފައެވެ. އަދި މިނިސްޓަރ ޝާހިދު ވަނީ ބަންގްލަދޭޝްގެ މިނިސްޓަރ އޮފް ފޮރިން އެފެއާޒަށް ފަސޭހަ ވަގުތެއްގައި ރާއްޖެއަށް ޒިޔާރަތްކުރެއްވުމަށް ދަޢުވަތުވެސް ދެއްވާފައެވެ.