ލީބިޔާގެ އައު އިންތިޤާލީ ސަރުކާރު ހުވައިކޮށްފިއެވެ.
މިދިޔަ ފެބްރުއަރީ މަހުގެ ތެރޭގައި އދން އިސްވެ ކުރިއަށް ގެންދިޔަ މަޝްވަރާތަކުގައި ލީބިޔާގެ ބޮޑުވަޒީރުކަން ޙަވާލުކުރުމަށް ނިންމީ އުމުރުން 61 އަހަރުގެ ވިޔަފާރިވެރިއެއްކަމަށްވާ އަބްދުލް ޙާމިދު ދަބައިބާއަށެވެ. އޭގެ އިތުރުން ރިޔާސީ ކައުންސިލަށް ހޮވާނެ ތިން މެންބަރުންވަނީ ކަނޑައަޅައިފައެވެ. އެ ހަތަރު ބޭފުޅުންވެސް މަޤާމުގެ ހުވައި ކުރެއްވީ ލީބިޔާގެ ޤާނޫނުހަދާ މަޖިލީހުގެ ތިރިގޭގެ ހާޒިރުގައެވެ.
މި އަހަރުގެ ޑިސެންބަރު މަހުގެ 24ވަނަ ދުވަހު ލީބިޔާގައި އިންތިޚާބު ބޭއްވެންދެން ޤައުމު ހިންގާނީ އެ ބޭފުޅުންނެވެ. ބޮޑުވަޒީރު ދަބައިބާގެ ވަޒީރުންގެ މަޖިލީހުގައި ބޮޑުވަޒީރުގެ 2 ނައިބުންނާއި 26 ވަޒީރުންނާއި 6 ސްޓޭޓު މިނިސްޓަރުން ތިއްބަވާނެއެވެ. މިދިޔަ ހަފުތާގެ ތެރޭގައި ލީބިޔާގެ ޤާނޫނުހަދާ މަޖިލީހުންވަނީ ވަޒީރުންގެ މަޖިލީހަށް ރުހުން ދީފައެވެ.
2011ވަނަ އަހަރުގެ ތެރޭގައި ލީބިޔާ ޒަޢީމް ކާނަލް މުޢައްމަރުލް ޤައްޒާފީގެ ވެރިކަން ވެއްޓުމުން އެ ޤައުމުގައި ބައިބައިވުންތަކާއި ހަމަނުޖެހުން އުފެދުނެވެ. އެގޮތުން ލީބިޔާގެ އުތުރާއި ދެކުނުގައި ވެރިކަން ކުރަމުންދިޔަ ދެ ސަރުކާރުން ދިޔައީ ޤައުމުގެ ވެރިކަމަށް އައުމަށް ހަނގުރާމަކުރަމުންނެވެ. ނަމަވެސް މިދިޔަ އޮކްޓޫބަރު މަހުން ފެށިގެން ލީބިޔާގެ އިދިކޮޅު ފަރާތްތަކުންވަނީ ޙަމަލާ ބަދަލުކުރުން ހުއްޓައިލައިފައެވެ. ލީބިޔާއަށް ހަމަޖެހުން ގެނައުމަށް އދން ކުރަމުންދާ މަސައްކަތުގެ މައިގަނޑު މަޤްސަދަކީ ޙަމަލާ ބަދަލުކުރުން ހުއްޓާލާފައި އޮތް އޮތުން ދެމެހެއްޓުމެވެ.