މިޞްރުން ޤަބޫލުކުރާ އުސޫލުތަކާއި ލަނޑުދަނޑިތަކާ ތުރުކީވިލާތުގެ ޢަމަލުތައް ދިމާވާން ޖެހޭކަމަށް މިޞްރުގެ ޚާރިޖީ ވަޒީރު ސާމިހު ޝުކުރީ ވިދާޅުވެއްޖެއެވެ. އޭނާ އެހެން ވިދާޅުވީ މިޞްރާއި ތުރުކީވިލާތާ ދެމެދު އޮންނަ ގުޅުން ބަދަހިކުރުމަށް ތުރުކީވިލާތުން އިސްވެ މަސައްކަތް ކުރަމުންދާ ދަނޑިވަޅެއްގައެވެ.
2013ވަނަ އަހަރު މިޞްރުގެ އަސްކަރިއްޔާއިން ބަޣާވާތް ކުރުމަށްފަހު އޭރުގެ ރައީސް މުޙައްމަދު މުރުޞީވަނީ މަޤާމުން ދުރުކޮށްފައެވެ. އޭގެ ފަހުން މިޞްރާއި ތުރުކީވިލާތާ ދެމެދު އޮންނަ ގުޅުންވަނީ ހީނަރުވެފައެވެ. މުރުޞީއަކީ ތުރުކީވިލާތުގެ ރައީސް ރަޖަބް ޠައްޔިބު އުރުދުޣާންއާ ގާތް ގުޅުމެއް ބޭއްވެވި ބޭފުޅެކެވެ.
މިދިޔަ ހަފުތާގެ ތެރޭގައި ތުރުކީވިލާތުންވަނީ މިޞްރާއެކު ޚާރިޖީ މުޢާމަލާތްތައް އަލުން ކުރަން ފަށައިފައިވާކަން އިޢުލާނުކޮށްފައެވެ. އަދި ދެ ޤައުމުގެ ދެމެދުގައި އޮންނަ ގުޅުން ރަނގަޅުކުރުމަށް ތުރުކީވިލާތުން މަސައްކަތް ކުރަމުންދާކަމަށްވަނީ ބުނެފައެވެ.
މިޞްރުގެ ޚާރިޖީ ވަޒީރު ޝުކުރީ ވިދާޅުވީ އެ ޤައުމުގެ ދީމިޤުރާޠީ އޮނިގަނޑުގެ ދަށުން ދެ ޤައުމުގެ ދެމެދުގައި ކޮށްފައިވާ މުޢާމަލާތްތައް ފިޔަވައި އިތުރު މުޢާމަލާތެއް މިހާތަނަށް ކޮށްފައި ނުވާކަމަށެވެ. އަދި ތުރުކީވިލާތުގެ ޢަމަލުތައް މިޞްރުގެ އުސޫލުތަކާއި ލަނޑުދަނޑިތަކާ އެއްގޮތަށް ބަހައްޓާނަމަ ދެ ޤައުމުގެ ދެމެދުގައި އޮންނަ ގުޅުން ބަދަހި ކުރުމަށް ބިންގާ އެޅޭނެކަމަށް އޭނާ ވިދާޅުވިއެވެ.