ޔުއޭފާ ވިމެންސް ޗެމްޕިއަންސް ލީގުގެ ކްއާޓަރ ފައިނަލުން މެންޗެސްޓަރ ސިޓީ ވިމެން ޖާގަހޯދައިފިއެވެ. މި މުބާރާތުގެ ކްއާޓަރ ފައިނަލުން ސިޓީ ވިމެން ޖާގަހޯދީ ފަހު 16 ޓީމްގެ ބުރުގައި އިޓަލީވިލާތުގެ ފިއޮރެންޓީނާ ފެމިނިލޭ އާއި ބައްދަލުކުރި ދެލެގް 8 ލަނޑު ސުންލަނޑުގެ އެގްރިގޭޓް ނަތީޖާއަކުން ކާމިޔާބުކޮށްގެންނެވެ.
މިދެޓީމްގެ މެދުގައި ކުޅުނު ފުރަތަމަ ލެގް 3 ލަނޑު ސުންލަނޑުން ސިޓީ ވިމެން ކާމިޔާބުކޮށްފައިވާއިރު ރޭ ކުޅުނު ދެވަނަ ލެގް އެޓީމް ކާމިޔާބުކުރީ 5 ލަނޑު ސުންލަނޑުންނެވެ. ފިއޮރެންޓީނާގެ ދަނޑުގައި ކުޅުނު މިމެޗްގެ ފުރަތަމަ ލަނޑު ސިޓީ ވިމެންއިން ކާމިޔާބުކުރީ މެޗްގެ 6 ވަނަ މިނެޓްގައެވެ. މިލަނޑު އެޓީމަށް ޖަހައިދިނީ އެލެން ވައިޓްއެވެ. އަދި ދެވަނަ ލަނޑު މެޗްގެ 18 ވަނަ މިނެޓްގައި ލިބުނު ޕެނަލްޓީއަކުން ކެރޮލީން ވެއާ ކާމިޔާބުކޮށްދިންއިރު އެޓީމްގެ ތިންވަނަ ލަނޑު މެޗްގެ 32 ވަނަ މިނެޓްގައި ޖަހައިދިނީ ފުރަތަމަ ލަނޑުވެސް ޖަހައިދިން ވައިޓްއެވެ. މިމެޗްގައި ސިޓީ ވިމެންއިން ޖެހި ފަހު ދެ ލަނޑު މެޗްގެ 60 ވަނަ މިނެޓާއި 78 ވަނަ މިނެޓްގައި ޖަހައިދިނީ ސޭމް މެވިސްއެވެ.
މިކާމިޔާބީއާއެކު ސިޓީ ވިމެން މިވަނީ މިދިޔަ ސީޒަނަށްވުރެ އެއް ހަރުފަތް މައްޗަށް ޖެހިލާފައެވެ. މިދިޔަ ސީޒަންގައި ސިޓީ ވިމެންވަނީ ފަހު 16 ޓީމްގެ ބުރުން ސްޕެއިންގެ އެޓްލެޓިކޯ މެޑްރިޑާއި ބައްދަލުކޮށް ބަލިވެފައެވެ.
މެޗަށްފަހު ސިޓީ ވިމެންގެ ކޯޗް ގެރެތު ޓެއިލަރ ބުނީ އޭނާގެ ޓީމުގެ ކުޅުންތެރިން ތިބީ ދެވެން އޮތް އެންމެ ކުރިއަކަށް ގޮސް ހޯދެން އޮތް އެންމެ ބޮޑު ކާމިޔާބީއެއް ހޯދުމަށް ވަރަށް ބޭނުންވެފައިކަމަށެވެ. އަދި މި މުބާރާތުގެ ފަހު މަރްހަލާގައި އޭނާގެ ޓީމް ބައިވެރިވާން ބޭނުންވާކަމަށްވެސް ޓެއިލަރ ބުންޏެވެ. އަދި ކުއާޓަރ ފައިނަލުގައި ފަސޭހަ ޓީމަކާއި ކުރިމަތި ނުވާނެކަމަށާއި ކޮންމެ ޓީމަކާއި ކުރިމަތިލާން ޖެހުނުނަމަވެސް ތިބެންޖެހޭނީ ތައްޔާރަށް ކަމަށް އޭނާ ބުންޏެވެ.