މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ މަޤާމުން ދާދިފަހުން ވަކިކުރެއްވި މުޙައްމަދު މަލީހު ޖަމާލް ޖުމްހޫރީ ޕާޓީން ވަކިވެވަޑައިގެންފިއެވެ.
މަލީހު ވިދާޅުވީ، ސަރުކާރުތެރޭ ޖޭޕީގެ އަޑު އެންމެ އިޚުލާސްތެރިކަމާއި އެކު އުފުލި މީހާއާއި ދޭތެރޭ ބޭއިންސާފުން އެމްޑީޕީއިން ކަންކުރަމުން ދިޔައިރު އެޕާޓީ އޮތީ ހަނުކަމަށާއި، ބޮޑެތި ތުހުމަތުތަކާއި އެކު ވަކި ކުރެވުނެ ފަރާތްތަކާއި މެދު ފިޔަވަޅު ނާޅާކަމަށެވެ. އަދި ޖޭޕީއާއި ފެޔަށް ޖެހިވަޑައިގެންނެވިކަން މަލީހު ހާމަކުރެއްވިއެވެ.
މަލީހު މިހެން ވިދާޅުވިއިރު، އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ސިޔާސީ ހަރަކާތެއްގައި މަލީހު ބައިވެރިވެވަޑައިގަތުމާއި ގުޅިގެން ޖުމްހޫރީ ޕާޓީން ވަނީ މަލީހުއާއި މެދު ފިޔަވަޅު އެޅުމަށް ނިންމާފައެވެ. ނަމަވެސް ޖިންސީ ގޯނާގެ ތުހުމަތުގައި މިނިސްޓަރުކަމުން ދުރުކުރި ޖުމްހޫރީ ޕާޓީގެ ރައީސް އަދި ކުރީގެ ޓޫރިޒަމް މިނިސްޓަރ އަލީ ވަހީދމެދު ފިޔަވަޅު އެޅިކަމެއް ނޭނގެއެވެ.
"ސަރުކާރުތެރޭ ޖޭޕީގެ އަޑު އެންމެ އިޚުލާސްތެރިކަމާއި އެކު އުފުލި މީހާއާއި ދޭތެރޭ ބޭއިންސާފު ހުސްކޮށް އެމްޑީޕީއިން ކަންކުރަމުން ދިޔަ އިރު ހަނު. ބޮޑެތި ތުހުމަތުތަކާއި އެކު ވަކި ކުރެވުނެ ފަރާތްތަކާއި މެދު ފިޔަވަޅު ނާޅާ. ކޯލިޝަންގައި ދަލު ބޭރުން. މިވަގުތު ޖޭޕީއާއި ފެޔަށް ޖެހިލާނަން." މުޙައްމަދު މަލީހު ޖަމާލް
މަލީހު މިހެން ވިދާޅުވެފައިވަނީ، ފިޝަރީޒް މިނިސްޓަރ ޒަހާގެ އިތުބާރު ނެތްކަމުގެ މައްސަލަ އިދިކޮޅުން މަޖިލީހަށް ވެއްދުމުން އެމްއާރުއެމްގެ ރައީސް މައުމޫން ޢަބްދުލްޤައްޔޫމް ޒަހާގެ ދިފާޢުގައި ކުރެއްވި ޓްވީޓާއި، ޖޭޕީން މަލީހުއާއި މެދު ފިޔަވަޅު އެޅުމަށް ނިންމި ޚަބަރާއެކުއެވެ.