ސޫރިޔާގެ ރައީސް ބައްޝާރުލް އަސަދަށާއި އޭނާގެ އަނބިކަންބަލުން އަސްމާ އަލްއަސަދަށް ކޯވިޑް-19 ޖެހިއްޖެއެވެ.
ސޫރިޔާގެ ރައީސްގެ ރަސްމީ އިދާރާއިން ނެރުނު ބަޔާނެއްގައި ބުނީ ދެ ބޭފުޅުންގެ ފަރާތުން ބަލީގެ އަލާމާތްތައް ކޮންމެވެސް ވަރަކަށް ފެންނަން ފެށުމުން ކޯވިޑް-19އަށް ތަހުލީލުކޮށްފައިވާކަމަށާއި ތަހުލީލުގެ ނަތީޖާއިން ދެ ބޭފުޅުންނަށްވެސް ކޯވިޑް-19 ޖެހިފައިވާކަން ކަށަވަރުވެފައިވާކަމަށެވެ. ދެ ބޭފުޅުންގެ ހާލުކޮޅުވެސް ރަނގަޅުކަމާއި ރަސްމީ ގެކޮޅުގައި އެކަހެރިވެވަޑައިގެން ތިއްބަވާ މަސައްކަތް ކުރައްވަމުން ގެންދަވާނެކަމަށް ރިޔާސީ އިދާރާއިން ނެރުނު ބަޔާނުގައި ބުނެފައިވެއެވެ.
18 މިލިއަން މީހުންގެ އާބާދީއެއް އޮންނަ ސޫރިޔާގައި މިހާތަނަށް 10،374 މީހުންނަށް ކޯވިޑް-19 ޖެހި، 1،063 މީހުންވަނީ މަރުވެފައެވެ. މިދިޔަ ފެބްރުއަރީ މަހުން ފެށިގެން ސޫރިޔާގައި ކޯވިޑް-19 ޖެހޭ މީހުންގެ ޢަދަދުވަނީ ވަރަށް ބޮޑަށް އިތުރުވެފައެވެ. ފާއިތުވި 24 ގަޑިއިރުގެ ތެރޭގައި އެ ޤައުމުގައި 61 މީހުންނަށް ކޯވިޑް-19 ޖެހި، 5 މީހުންވަނީ މަރުވެފައެވެ. އެ ޤައުމުން އާންމުކުރާ ރަސްމީ ޢަދަދުތަކަށްވުރެ ބަލި ޖެހިފައިވާ މީހުންގެ އަސްލު ޢަދަދު އިތުރުވާނެކަމަށް ޞިއްޙީ މާހިރުން ޤަބޫލުކުރެއެވެ.
ދުނިޔޭގެ ގިނަ ޢަދަދެއްގެ އިސްވެރިންނަށް މީގެ ކުރިންވަނީ ކޯވިޑް-19 ޖެހިފައެވެ. އޭގެ ތެރޭގައި އިނގިރޭސިވިލާތުގެ ބޮޑުވަޒީރު ބޮރިސް ޖޮންސަންއާއި ފަރަންސޭސިވިލާތުގެ ރައީސް އެމަނުއަލް މެޚްރޮންއާއި އެމެރިކާގެ ކުރީގެ ރައީސް ޑޮނަލްޑް ޓްރަންޕު ހިމެނިވަޑައިގަންނަވައެވެ.