ރާއްޖެއަށް އޮކްސިޖަން ސިލިންޑަރު ގެނައުމަށް މޯލްޑިވް ގޭހުން ހިންގިކަމަށް ތުހުމަތުކުރާ ކޮރަޕްޝަންގެ މައްސަލަ އެންޓި-ކޮރަޕްޝަން ކޮމިޝަނުން ތަޙުޤީގުކުރަމުން އަންނަކަމަށް އެ ކޮމިޝަނުން ވިދާޅުވެއްޖެއެވެ.
ކޯވިޑް-19 އާ ގުޅިގެން 4،128 އޮކްސިޖަން ސިލިންޑަރު ގެނައުމަށް ހިންގި ޚިޔާނާތް 16 މިލިއަން ރުފިޔާއަށް އަރައެވެ. އެ ކޮރަޕްޝަންގެ ތުހުމަތު ކުރަނީ މޯލްޑިވް ގޭސް ވަގުތީ ގޮތުން ހިންގެވުމާއި ހަވާލުވެހުންނެވި އެކުންފުނީގެ ޑެޕިއުޓީ މެނޭޖިންގ ޑިރެކްޓަރ އިކްރާމް ޢަލީގެ މައްޗަށެވެ.
އޭސީސީން ވިދާޅުވީ، ރާއްޖެއަށް އޮކްސިޖަން ސިލިންޑަރުތަކެއް ގެނައުމަށް މޯލްޑިވް ގޭސްއިން ހިންގާފައިވާކަމަށް ތުހުމަތުކުރެވޭ ކޮރަޕްޝަންގެ މައްސަލައެއް މިދިޔަ އަހަރު އެކޮމިޝަނުން ބަލަން ފަށާފައިވާކަމަށެވެ. ނަމަވެސް އެ މައްސަލައިގެ ތުހުމަތު ކުރެވެނީ ކިތައް މީހުންގެ މައްޗަށްކަން އޭސީސީން ވިދާޅެއް ނުވެއެވެ.
މޯލްޑިވް ގޭހުން 47 ލީޓަރުގެ އޮކްސިޖަން ސިލިންޑަރުތައް ހޯދުމަށް ކޯޓޭޝަން ފޮނުވީ ބޭރުގެ ހަ ކުންފުންޏަކަށެވެ. އޭގެތެރެއިން ކުރިމަތިލީ އެއް ކުންފުންޏަށް 1،000 ސިލިންޑަރު ގަންނަން ހަވާލުކޮށް ބާކީ 3،000 ސިލިންޑަރު ގެނައުމަށް އެއްބަސްވީ ސިންގަޕޫރުގެ ޕްރޯބިޒް ކިޔާ ކުންފުންޏަކާ އެކުކަމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގެ މަޢުލޫމާތުތަކުން އެނގެއެވެ. ނަމަވެސް އެ ކުންފުނިން ފޮނުވި ރީފާބިޝްޑް ސިލިންޑަރުތައް ބޭނުމެއް ނުކުރެވެއެވެ.
އެސްއޯއީ ކޮމިޓީގެ މުގައްރިރު ވިދާޅުވީ، ޕްރޯބިޒްގެ އަގު އެހެން ކުންފުނިތަކަށް ވުރެން ބޮޑުކަމަށެވެ. އެކުންފުނި މެދުވެރިކޮށް ސިލިންޑަރު ގެނައުމަށް އިކްރާމް އިރުޝާދު ދެއްވާފައިވާ ސަބަބަކީ އަގު ބޮޑުވިޔަސް ވިހާވެސް އަވަހަށް އެތަކެތި ގެނައުންކަން އެނގެން އޮތްކަމަށެވެ. އަދި އައު އޮކްސިޖަން ސިލިންޑަރުތައް ފޮނުވަން އެދުމުން ސިންގަޕޫރުގެ ކުންފުނިން ފޮނުވާފައި ހުރީ ބާ ސިލިންޑަރުތަކެއްކަންވެސް ކޮމިޓީގެ މަޢުލޫމާތުތަކުން ވަނީ ހާމަވެފައެވެ.
މޯލްޑިވް ގޭހުން އޮކްސިޖަން ސިލިންޑަރު ގެނައުމުގައި ކަން ހިންގާފައިވާ ގޮތް ބެލުމަށް އެކުންފުނީގެ ބެލެނިވެރި ކުންފުނި އެސްޓީއޯ އިން ވަނީ އިންޓަރނަލް އޮޑިޓެއްވެސް ހަދާފައެވެ.
މޯލްޑިވް ގޭހުގެ ކޮރަޕްޝަންގެ މައްސަލައެއް އޭސީސީން ބަލަމުން އަންނައިރު، މިދިޔަ ސަރުކާރުގެ ތެރެއިންވެސް އެކުންފުނިން ހިންގި ކޮރަޕްޝަންގެ ބޮޑެތި މައްސަލަތަކެއް ފެންމަތިވިއެވެ.