މިޔަންމާގައި ކުރަމުންދާ މުޒާހަރާތައް ހޫނުވެ އިތުރު 9 މީހުން މަރުވެއްޖެއެވެ.
މިޔަންމާގެ އެންމެ އިސްވެރިޔާ އަން ސަން ސޫ ކީއާއި އޭނާގެ ސަރުކާރާ ދެކޮޅަށް އެ ޤައުމުގެ ސިފައިން ބަޣާވާތްކުރުމަށްފަހު ސޫ ކީއާއި އެނާގެ ސަރުކާރަށް ނިސްބަތްވާ އިސްވެރިން ހައްޔަރު ކުރީ މިދިޔަ މަހުގެ އެއްވަނަ ދުވަހުއެވެ. އެއަށްފަހު އަސްކަރިއްޔާއިންވަނީ އެ ޤައުމުގައި އެއް އަހަރުގެ މުއްދަތަށް ކުއްލި ޙާލަތު އިޢުލާނުކޮށްފައެވެ. އަސްކަރިއްޔާއިން ކުރި ބަޣާވާތް ނިމުމަކަށް ގެނެސް ސޫ ކީ މިނިވަންކުރުމަށް ގޮވާލައި މިޔަންމާގެ ގިނަ ޢަދަދެއްގެ ރައްޔިތުން ދަނީ މަގުމައްޗަށް ނުކުމެ މުޒާހަރާކުރަމުންނެވެ. އެ ޤައުމުގައި މުޒާހަރާތައް ކުރަމުންދާތާ ހަތަރު ހަފުތާވެއްޖެއެވެ.
މިޔަންމާގައި ކުރަމުންދާ މުޒާހަރާތަކުގައި މީގެ ކުރިން 22 މީހުންވަނީ މަރުވެފައެވެ. އަވަށްޓެރި ޤައުމުތަކުންވަނީ މުޒާހަރާގެ ބައިވެރިންނަށް ޙަމަލާ ދިނުން ހުއްޓާލުމަށް މިޔަންމާގެ އަސްކަރިއްޔާއަށް ގޮވައިލައިފައެވެ. އަދި މިޔަންމާގެ ހާލަތު ރަނގަޅުކުރުމަށް އެ ޤައުމުތަކުން އެހީތެރިވެދޭނެކަމަށްވަނީ ބުނެފައެވެ. އަވަށްޓެރި ޤައުމުތަކުން އެހެން ގޮވާލުމުގެ ފަހުންވެސް މިޔަންމާގެ އަސްކަރިއްޔާއިންވަނީ މުޒާހަރާގައި ބައިވެރިވި 9 މީހުން މަރާލައިފައެވެ.
މުޒާހަރާތަކުގައި އިސްކޮށް ޙަރަކާތްތެރިވާ ފަރާތަކުން ބުނީ ބަޑި ޖެހުމުގެ އިތުރުން ކަރުނަ ގޭހާއި ސްޓަން ގްރެނޭޑުވެސް މުޒާހަރާގެ ބައިވެރިންނާ ދެކޮޅަށް އަސްކަރިއްޔާއިން ބޭނުންކޮށްފައިވާކަމަށެވެ.