އިނގިރޭސި ރާނީ އެލިޒަބެތުގެ ފިރިކަލުން އަދި ޑޫކް އޮފް އެޑިންބާގު، ޕްރިންސް ފިލިޕް ހަސްފަތާލުގައި އެނދުމަތިކޮށްފައިވާކަމަށް އިނގިރޭސިވިލާތުގެ ޝާހީ ގަނޑުވަރު، ބަކިންހަމް ޕެލެސްއުން ބުނެފިއެވެ.
ބަކިންހަމް ޕެލެސްއުން ނެރުނު ބަޔާނެއްގައި ބުނީ އުމުރުން 99 އަހަރުގެ ޕްރިންސް ފިލިޕްގެ ޞިއްޙީ ޙާލަތު ރަނގަޅު ނޫންކަމަށް ފާހަގަވުމާއިއެކު ރައްކާތެރިކަމުގެ ފިޔަވަޅެއްގެ ގޮތުގައި ލަންޑަންގައި ހުންނަ ކިންގ އެޑްވާޑް ދަ ސެވެންތް ހަސްފަތާލަށް އެމަނިކުފާނު ގެންގޮސްފައިވާކަމަށެވެ. ކަމާއިބެހޭ މަޢުލޫމާތު އެނގޭ މަސްދަރަކުން ބުނީ ޕްރިންސް ފިލިޕް ހަސްފަތާލަށް ވަޑައިގެންނެވީ ކާރުގައި ކަމަށާއި އެމަނިކުފާނު އެނދުމަތިކޮށްފައިވަނީ ޑޮކްޓަރުންގެ ލަފާގެ މަތިންކަމަށެވެ.
ޕްރިންސް ފިލިޕް ބަލިކޮށް އުޅުއްވާތާ ކުޑަދުވަސްކޮޅެއް ވެފައިވާކަމަށާއި ނަމަވެސް އެމަނިކުފާނުގެ ޞިއްޙީ ހާލުކޮޅާއި ކޮރޯނާވައިރަހާއި ގުޅުމެއް ނުވާކަމަށް އެ މަސްދަރުން ބުނެއެވެ.
ޕްރިންސް ފިލިޕްގެ ޙާލަތު ޑޮކްޓަރުން ގާތުން ބެލުމަށް އެމަނިކުފާނު ހަސްފަތާލުގައި ދުވަސްކޮޅެއް ހޭދަކުރައްވާނެކަމަށް ބެލެވެއެވެ. ޕްރިންސް ޕިލިޕްގެ އަނބުކަނބަލުން ރާނީ އެލިޒަބެތު ދެވަނަ ހުންނެވީ ވިންޑްސޮ ކާސުލްގައެވެ.
މިދިޔަ މަހުގެ ތެރޭގައި ބަކިންހަމް ޕެލަސުންވަނީ ޕްރިންސް ފިލިޕާއި ރާނީ އެލިޒަބެތަށް ކޯވިޑް ވެކްސިން ޖެއްސެވިކަން އިޢުލާނުކުރައްވާފައެވެ. ކޯވިޑްގެ ސަބަބުން އިނގިރޭސިވިލާތް ލޮކްޑައުން ކޮށްފައިވާއިރު ދެ ބޭފުޅުން ލޮކްޑައުން ޙާލަތުގައި ތިއްބަވަމުންދަނީ މަދު ސްޓާފުންކޮޅަކާއިއެކު ވިންޑްސޮ ކާސުލްގައެވެ.