ފަލަސްޠީނުގެ ޣައްޒާ ސްޓްރިޕުގައި ކުރީ ސަފުގައި މަސައްކަތްކުރާ ޞިއްޙީ ޚިދުމަތްވެރިންނަށް ދިނުމަށް ހޯދާފައިވާ ރަޝިޔާގެ ސްޕަޓްނިކް ފަހެއްގެ 1،000 ވެކްސިން ޑޯޒް އެ ސަރަޙައްދަށް އެތެރެކުރުމަށް އިސްރާއީލުން ހުރަސް އަޅައިފިއެވެ.
ޣައްޒާ ކޮންޓްރޯލްކުރަމުން އަންނަ ހަމާސް ޖަމާޢަތުންވަނީ ޣައްޒާގެ ޞިއްޙީ ޚިދުމަތްތެރިންނަށް ލިބެންޖެހޭ ވެކްސިންތައް އިސްރާއީލުން ހުއްޓުވާފައިވާތީ އިސްރާއީލުގެ އަމަލުތައް ކުށްވެރިކޮށްފައެވެ. 2 މިލިއަނަށްވުރެ ގިނަ މީހުން ދިރިއުޅޭ ޣައްޒާ ސްޓްރިޕަށް ވައިގެ މަގުންނާއި ކަނޑުމަގުންނާއި އެއްގަމުގެ މަގުން ނުވަދެވޭނޭހެން އިސްރާއީލުން ބަންދުކޮށްފައިވާއިރު، އޭގެ ބޭނުން ހިފައި ވެކްސިން އެތެރެކުރުމަށް ހުރަސްއެޅުމަކީ ބައިނަލްއަޤްވާމީ ޤާނޫނުތަކާއި ޚިލާފުކަމެއްކަމަށް ހަމާސްއިން ބުނެއެވެ. ހަމާސްގެ ތަރުޖަމާނު، ހާޒިމް ޤައްސާމް ބުނީ އިސްރާއީލުގެ އަމަލުތަކަކީ ބޮޑު ޖަރީމާއެއްކަމަށާއި ބައިނަލްއަޤްވާމީ ހުރިހާ ޤާނޫނުތަކާއި އިންސާނިއްތަތުކަމުގެ މިންގަނޑުތަކާއި ޚިލާފު އަމަލެއްކަމަށެވެ.
ފަލަސްޠީނުގެ ޞިއްޙަތާއިބެހޭ ވަޒީރު މައި އަލްކައިލާ ނެރުއްވި ބަޔާނެއްގައި ވިދާޅުވީ ފަލަސްޠީނިއަން އޮތޯރިޓީން ހޯދާފައިވާ ވެކްސިންތައް ޣައްޒާއަށް އެތެރެނުކުރެވޭގޮތް ހެދުމުގެ ފުރިހަމަ ޒިންމާ އުފުލަންޖެހޭނީ އިސްރާއީލުންކަމަށެވެ.
އިސްރާއީލުން އިސްތިއުމާރުކޮށްފައިވާ ފަލަސްޠީނުގެ ހުޅަނގު އައްސޭރި ކޮންޓްރޯލް ކުރަނީ ފަލަސްޠީނިއަން އޮތޯރިޓީ، ޕީއޭ އިންނެވެ. ޕީއޭއިންވަނީ ރަޝިޔާގެ ވެކްސިންގެ 2،000 ޑޯޒް މިހާތަނަށް ހޯދާފައެވެ. ޕީއޭއިން ހޯދާ ވެކްސިންގެ އެއްބައި ޣައްޒާއާއިއެކު ޙިއްޞާކުރާނެކަމަށް ޕީއޭއިންވަނީ ބުނެފައެވެ. ޣައްޒާއަށް މިހާތަނަށް އެއްވެސް މިންވަރަކަށް ކޯވިޑް ވެކްސިން ލިބިފައެއް ނުވެއެވެ. ޣައްޒާގައި މިހާތަނަށް 53،000 މީހުންނަށް ކޯވިޑް ޖެހި 537 މީހުންވަނީ މަރުވެފައެވެ.
މީހުންގެ ނިސްބަތަށް ބަލާއިރު ދުނިޔޭގައި އެންމެ ހަލުވިކޮށް ކޯވިޑް ވެކްސިން ދެމުންދާ އެއް ޤައުމުގެ ގޮތުގައި އޮތީ އިސްރާއީލެވެ. އިސްރާއީލުން އިސްތިއުމާރުކޮށްފައިވާ ފަލަސްޠީނަށް ކޯވިޑް ވެކްސިން ފޯރުކޮށްދިނުމަށް ޤައުމުތަކުން ދަނީ އިސްރާއީލަށް ގޮވައިލަމުންނެވެ.
ޝިފާއުޏ ފުވައްމުލައް
ޔާﷲ ޔަހޫދީން ނެތިކުރައްވާ މުސްލިމުންގެ ބިންތައް ލާދީނީ ވެރިންގެ ކިބައިން ސަލާމަތްކުރައްވާށި