ޤަވާއިދާ ޚިލާފަށް ރާއްޖޭގެ ސަރަހައްދަށް ވަދެގެން އުޅުނު ބޭރުގެ މަސްބޯޓެއް އެމްއެންޑީއެފްގެ ބެލުމުގެ ދަށަށް ގެންގޮސްފިއެވެ.
އެމްއެންޑީއެފުން ވިދާޅުވީ، ޤަވާޢިދާ ޚިލާފަށް ރާއްޖެ ސަރަޙައްދަށް ވަދެގެން އުޅުނު ބޯޓު ފެނިފައިވަނީ ހދ.ނައިވައިދޫ ހުޅަނގުން 7 ނޯޓިކަލް މޭލު ބޭރުންކަމަށެވެ. މި މަސް ބޯޓާ ބެހޭ މަޢުލޫމާތު އެމްއެންޑީއެފްއަށް ލިބިފައިވަނީ މިއަދު ހަވީރު 17:42 ހާއިރު އެ ސަރަހައްދުގައި މަސްވެރިކަން ކުރަން އުޅުނު ހދ.މަކުނުދޫ “ރަންދި” ނަމަކަށް ކިޔާ ދޯންޏަކުންކަމަށްވެސް އެމްއެންޑީއެފުން ވިދާޅުވިއެވެ.
އެމްއެންޑީއެފުން ވިދާޅުވީ، ބޭރުގެ މަސްބޯޓް އެމްއެންޑީއެފްގެ ކޯސްޓްގާޑުގެ ބެލުމުގެ ދަށަށް ގެންގޮސްފައިވަނީ މިރޭ 21:41 ހާއިރުކަމަށެވެ. އަދި އެ ބޯޓު ކުޅުދުއްފުށްޓަށް ގެންގޮސްފައިވާކަަމށްވެސް އެމްއެންޑީއެފުން ވިދާޅުވިއެވެ. އެ ބޯޓުގައި ތިބީ 6 މީހުންކަމަށާއި، ސަރުކާރުގެ ކަމާ ގުޅުންހުރި އިދާރާތަކާއި ގުޅިގެން އެ މައްސަލަ ބަލަމުންދާކަމަށްވެސް އެމްއެންޑީއެފުން ވިދާޅުވިއެވެ.