އިންޑިޔާގެ ބަޑިބޭސް އުފައްދާ ކާރުޚާނާއެއްގައި ހިނގި ގޮވުންތަކެއްގައި 11 މީހުން މަރުވެއްޖެއެވެ.
އިންޑިޔާގެ ޓަމިލް ނާޑޫ ސްޓޭޓުގެ އަވަށެއްގައި ހުންނަ ކާރުޚާނާގައި ހިނގި ހާދިޘާގައި މަރު 11 މީހުންނަކީ އެ ކާރުޚާނާގައި މަސައްކަތްކުރާ މީހުންނެވެ. މީގެއިތުރުން އެތަނުގައި މަސައްކަތްކުރާ 34 މީހަކު ވަނީ ޒަހަމްވެފައެވެ. އެ ހާދިޘާ ހިނގާފައިވަނީ ބަޑިބޭސް ތައްޔާރުކުރުމަށް ކެމިކަލް އެއްކުރުމުގެ މަސައްކަތް ކުރަމުންދަނިކޮށްކަމަށް ބައެއް މަސްދަތުރަކުން ބުނެއެވެ.
މި ހާދިޘާ ގުޅިގެން މިހާތަނަށް 2 މީހަކު ވަނީ ހައްޔަރުކޮށްފައެވެ. އޭގެތެރޭގައި އެތަނުގެ ވެރިޔާވެސް ހިމެނެއެވެ. ސަރުކާރުންވަނީ މި ހާދިޘާ މަރުވި ކޮންމެ މީހެއްގެ އާއިލާއަށް 2 ލައްކަ އިންޑިއަން ރުޕީސް ދިނުމަށް ނިންމާފައެވެ. އަދި ޒަހަމްވި ކޮންމެ މީހެއްގެ އާއިލާއަށް 50 ހާސް ރުޕީސް ދިނުމަށްވެސް ވަނީ ނިންމާފައެވެ.
ފުލުހުންގެ ފަރާތުން ވާހަކަދެއްކެވި އޮފިސަރަކު ވިދާޅުވީ ހާދިޘާގައި އަނިޔާވި މީހުން ހަސްފަތާލަށް ގެންގޮސް ފަރުވާދެމުންދާކަމަށެވެ. ގޮވުންތަކުގެ ސަބަބުން ކާރުޚާނާގައި ރޯވި އަލިފާންގަނޑު ނިއްވާލުމަށް އަލިފާން ނިއްވާ ދިހަ ލޮރީވަނީ ހަރަކާތްތެރިވެފައެވެ. ކާރުޚާނާގައި ހިނގި ހާދިޘާގައި އެތަނުގައި ހުރި ހަތަރު ޝެޑެއްވަނީ ބޭނުން ނުކުރެވޭ ވަރަށް އެއްކޮށް ހަލާކުވެފައެވެ.
ބަޑިބޭސް އުފެއްދުމަކީ އިންޑިޔާގައި ވަރަށް ބޮޑު ވިޔަފާރިއެކެވެ. އެ ޤައުމުގައި ބާއްވާ ކައިވެނި ހަފުލާތަކުގައި އަދި ބޮޑެތި އެހެން ހަފުލާތަކުގައި ބަޑިބޭސް ގޮއްވުމަކީ އާންމުކަމެކެވެ. އެ ޤައުމުގައި ޤަވާއިދާއި ޚިލާފަށް ބަޑިބޭސް އުފައްދާ ގިނަ ކާރުހާނާތައް ހުރެއެވެ.